Astara rayonu Burzubənd kənd orta məktəbinin ingilis dili müəllimi Fuad Mehrəliyev kredit borcuna görə əməkhaqqını ala bilmədiyini deyir. O, bu barədə özü AzadlıqRadiosuna danışıb:
"Əməkhaqqından 1 manat da əlimə ala bilmirəm"
"Astara şəhər 2 saylı məktəbdə işləyərkən rüşvətə "yox" dediyim üçün məni müxtəlif yollarla işdən azad etdilər. Məni susdurmaq üçün üç dəfə həbs etdilər. Sağlamlıq haqqında sənədlərim olduğu halda polisin əli ilə Lənkəran Rayonlararası Psixiatriya Dispanserində bir ay saxladılar. İki ildən sonra işə bərpa olundum. Dağ kəndi olan Burzubənd kənd orta məktəbində dərs deyirəm. Bu məktəbin rəhbərliyindən narazı deyiləm. İş ondadır ki, mənə verilən əməkhaqqından 1 manat da əlimə ala bilmirəm".
Müəllimin sözlərinə görə, "Kapital Bank"ın Astara filialı aldığı əməkhaqqının hamısını kreditə çıxır:
"İşdən azad etməsəydilər, krediti indiyə kimi ödəmiş olardım"
"Məni işdən çıxartdılar, krediti ödəyə bilmədim. Mənim burda günahım yoxdur. İşdən azad etməsəydilər, krediti indiyə kimi ödəmiş olardım. Rayon təhsil şöbəsinə də, bankın mərkəzi ofisinə də müraciət etmişəm ki, əməkhaqqının 50 faizini tutsunlar. Rayon təhsil şöbəsi bununla bağlı sənədləri bankın Astara filialına göndərib. Lakin bank təhsil şöbəsinin göndərdiyi sənədləri icra etmir. Evdə qalmaqla əməkhaqqımın tam tutulmasına etiraz edirəm. Fikirləşmirlər ki, bu ailə pulsuz necə yaşayacaq?".
O deyir ki, problemin həll edilməsindən ötrü uyğun orqanlara həm yazılı, həm də şifahi müraciət edib: ""Kapital Bank"ın işçisi deyir ki, Azərbaycan Respublikasının qanununa görə, maaşdan 50 faiz tuta bilərlər. Mən soruşdum ki, qanuna nə üçün əməl etmirsiniz? Sualım cavabsız qaldı. Astara rayon Təhsil Şöbəsi müəllimin hüquqlarını müdafiə etməlidir. Mən kreditin ödənilməsindən imtina etmirəm. Bu ödəmə bir ailənin məhv edilməsi ilə baş verməməlidir".
"Novruz bayramı gəlir, evdə heç nə yoxdur"
F.Mehrəliyevin deməsinə görə, iqtisadi vəziyyəti yaxşı deyil: "Ailədə altı nəfərik. Üç azyaşlı uşağım var. Anam xəstədir, aldığı pensiyanı dərmanına verirəm. Qarşıdan Novruz bayramı gəlir, evdə heç nə yoxdur. Mən müəlliməm, üst-başım gərək yaxşı ola. Üç körpə uşağı böyütmək çətindir. Ailədə təminat çox aşağıdır. İşləyirəm, pul ala bilmirəm. Aldığım əməkhaqqından, heç olmasa, 150 manatını ödəsinlər. Yola da pul verirəm. Belə ədalətsizlik olarmı?".
F.Mehrəliyev sonra da deyib: ""Kapital Bank"ın Problemli Kreditlər Departamentinə zəng edirəm, qız götürür, dərdimi danışıram. Axırda deyir ki, hüquqşünas səninlə əlaqə saxlayar. Bir aydır belə davam edir".
Bu deyilənlərə, hələlik, Astara Təhsil Şöbəsindən münasibət almaq mümkün olmayıb. "Kapital Bank"ın Problemli Kreditlər Departamentindən isə suallarımıza cavab vermədilər. Oradan bildirdilər ki, bu barədə məlumatı ancaq müştərinin özünə verə bilərlər.
Xatırlatma
2018-ci il mayın 14-də AzadlıqRadiosunun saytında Astara şəhər 2 saylı orta məktəbin ingilis dili müəllimi F.Mehrəliyevlə müsahibə təqdim edilmişdi. Orada rüşvətə bulaşmadığını deyən müəllim məktəb direktorunun işdən çıxarılmasını və bu məsələyə təhsil nazirinin münasibət bildirməsini istədiyini dilə gətirmişdi. F.Mehrəliyevin iddiasına görə, məktəbdə müəllimlərdən pul yığılır və buna etiraz etdiyindən dəfələrlə şagirdlərinin yanında o, məzəmmət edilib, şəxsiyyətini alçaltmağa çalışıblar.
Astara şəhər 2 saylı orta məktəbin direktoru (hazırda həmin vəzifədə işləmir) isə həmin vaxt AzadlıqRadiosuna demişdi ki, rüşvətdə suçladığına, ona şər atdığına görə F.Mehrəliyevi məhkəməyə verəcək: "Müəllimlərdən pul yığmırıq. Nə üçün yığmalıyam? Maaş alırıq, bu da bizi qane edir. Müəllim məktəb üçün nəsə edir, özü bilər. O mənlik deyil".
Bu hadisələrdən sonra F.Mehrəliyev Lənkəran Rayonlararası Psixiatriya Dispanserinə aparılıb. Dispanserdə 27 gün saxlanılıb. Dispanserdən buraxılandan sonra məktəbdəki həmkarlarının iştirakı ilə iclas keçirilib və işdən çıxarılıb. F.Mehrəliyev işə bərpa olunmaq üçün məhkəmələrə üz tutub. Astara rayon Məhkəməsi onun iddiasını rədd edib. Şirvan Apellyasiya Məhkəməsi və Ali Məhkəmə də yerli instansiyanın qərarını qüvvədə saxlayıb. Məhkəmələr onun ekspertizaya göndərilməsi ilə bağlı vəsatətini təmin etməyiblər.
Rayon rəhbərləri və yerli hüquq-mühafizə orqanları isə, bir qayda olaraq, F.Mehrəliyevin iddialarını rədd edirlər.
Nəhayət, F.Mehrəliyev müəllimlər üçün nəzərdə tutulmuş testdən keçərək 2020-ci ilin sentyabrında işə bərpa olunub.
Astara rayonu Burzubənd kənd orta məktəbinin ingilis dili müəllimi Fuad Mehrəliyev yenidən Azadlıq Radiosu ilə əlaqə saxlayib. Deyib ki, ona probleminin həll ediləcəyi vədi verilib və hazırda o öz işi ilə məşğuldur, dərsini keçir.
