Çinin şimalındakı köhnə paytaxt yeri olan Xian-da göytürk hərfləri ilə və çincə yazılmış kitabə tapılıb.
Miladın 795-ci ilində qələmə alınmış abidə Uyğurıstan şahzadəsi Karı Çor-a (çincə Ge Çor) aid edilir.
Türkiyə mediasının yazdığına görə, bu münasibətlə Xian-dakı muzeydə türk, çin, fin və Avropalı alimlərin qatıldığı toplantı keçirilib.
Yazını ilk dəfə Türkiyəli prof. Dr. Cengiz Alyılmaz oxuyub. Türkcə mətnin yanında çincə yazının olmasını da o üzə çıxarıb.
İki dildə yazılmış bu kitabə 40 sm ölçüsündə kvadrat şəklindədir.
Yazı 19 yaşında ölən şahzadə Karı Çor-un cənazə mərasimi üçün hazırlanıb.
Türkiyəli alimin sözlərinə görə, kitabə o dönəmlərdə uyğur-çin əlaqələrinin yaxınlığını da göstərir.
Yazıda cənazə hazırlıqlarının Çin hökmdarı tərəfindən düzənləndiyi vurğulanır və türkcə-çincə mətnlər bir-birini tamamlayır.
Xatırladaq ki, daş kitabənin tapıldığı Xian şəhəri Shaanxi əyalətinin mərkəzidir və burada Qin xanədanın məzarlığı da var.
Tarix qoxan bu şəhər İpək Yolunun da başlanğıcı sayılır.
