Rusiya prezidenti Azərbaycan prezidentinə zəng vurub
Noyabrın 14-də Rusiya prezidenti Vladimir Putin Azərbaycan prezidenti İlham Əliyevə telefonla zəng edib.
Bu barədə Azərbaycan prezidentinin mətbuat xidməti məlumat yayıb.
Məlumata görə, telefon söhbəti zamanı Dağlıq Qarabağa dair üçtərəfli bəyanatda təsbit edilmiş razılaşmaların yerinə yetirilməsinin praktiki aspektləri müzakirə edilib.
Açıqlamaya görə, tərəflər atəşkəs rejiminə riayət edilməsindən və təmas xəttində vəziyyətin kifayət qədər sakit olmasından məmnun olduqlarını bildiriblər.
“Telefon söhbəti zamanı Rusiya prezidenti qeyd edib ki, üçtərəfli bəyanata müvafiq olaraq Azərbaycan Respublikasına qaytarılan rayonlarda xristian məbədləri və monastırları yerləşir. Bununla əlaqədar o, həmin ibadətgahların qorunub saxlanılmasının və normal fəaliyyətinin təmin edilməsinin vacibliyini vurğulayıb.”
Məlumata görə, prezident İlham Əliyev də qeyd edib ki, Azərbaycan çoxmillətli, çoxkonfessiyalı dövlətdir, burada bütün xalqların, bütün dinlərin nümayəndələrinin hüquq və azadlıqları tam təmin edilib:
“Azərbaycan ərazisində yerləşən qədim müsəlman və xristian ibadətgahları dövlət tərəfindən mühafizə olunur”
Bildirildiyinə görə, prezident İlham Əliyev deyib ki, üçtərəfli bəyanata müvafiq olaraq Azərbaycana qaytarılan ərazilərdə yerləşən xristian məbədləri dövlət tərəfindən lazımi qaydada mühafizə olunacaq: “Azərbaycanda yaşayan xristianlar bu məbədlərdən istifadə edə biləcəklər”,prezident qeyd edib.
Xatırlatma
Noyabrın 27-də Azərbaycan və Ermənistan silahlı qüvvələrinin təmas xəttində ağır döyüşlər başlamışdı. Azərbaycan açıqlayıb ki, noyabrın 9-u günün sonuna, döyüşlərin dayandırılmasına qədər 280 civarında kəndi, dörd qəsəbəni (Hadrut, Mincivan, Ağbənd, Bartaz), Şuşa və daha dörd şəhəri (Cəbrayıl, Füzuli, Zəngilan, Qubadlı) işğaldan azad edib.
Noyabrın 10-da Azərbaycan, Ermənistan və Rusiya rəhbərlərinin adından atəşkəs bəyanatı yayılıb. Sənədə görə, Azərbaycan işğaldan azad etdiyi ərazilərdə qalır. Dekabrın 1-dək Kəlbəcər, Ağdam və Laçın rayonlarının Azərbaycana qaytarılması nəzərdə tutulur. Laçın dəhlizində və qoşunların təmas xəttində isə Rusiya sülhməramlıları yerləşdirilir.
Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.
Noyabrın 14-də Rusiya prezidnti Vladimir Putin Azərbaycan Prezidenti İlham Əliyevlə yanaşı Ermənistanın Baş Naziri Nikol Paşinyanla danışıb. Bu barədə Rusiya prezidentinin rəsmi "kemlin.ru" saytı məlumat yayıb.
Kəlbəcər rayonun təhvil verilməsi noyabrın 25-nə qaldı
Kəlbəcər rayonun tam boşaldılaraq, Azərbaycana təhvil verilməsi noyabrın 25-nə qaldı.
Bu barədə bu gün, noyabrın 15-də keçirdiyi brifinqdə prezidentin köməkçisi Hikmət Hacıyev danışıb. Onun sözlərinə görə, bununla bağlı dünən, noyabrın 14-də Rusiya prezidenti Azərbaycan prezidenti ilə telefon danışığında Ermənistan tərəfinin müraciətini çatdırıb.
Halbuki, noyabrın 10-da Azərbaycan, Ermənistan və Rusiya rəhbərlərinin adından yayılan atəşkəs bəyanatına görə, Kəlbəcər rayonu noyabrın 15-nə, Ağdam rayonu 20-nə, Laçın rayonu isə dekabrın 1-nə kimi boşaldılmalı idi.
Hikmət Hacıyevin sözlərinə görə, bu məsələdə razılıq əldə edilib və o bunu humanizimlə izah elədi:
“Azərbaycan bunu nəzərə alaraq, humanistlik nümayiş etdirib və Kəlbəcərdə yerləşdirilmiş mülki əhalinin noyabrın 25-dək çıxarılmasına razılıq verib. Öhdəliklər qüvvədə qalır, vaxtın uzadılması ilə bağlı xüsusi bəyanat imzalanmasına ehtiyac yoxdur”.
Onun vurğulamasına görə, Ağdam və Laçın rayonu ilə bağlı qarafik dəyişmir.
Hikmət Hacıyev: “Ermənistanın Kəlbəcərdən çıxması vandalizm aktları ilə…”
“Azərbaycanın Kəlbəcər rayonunda qeyri-qaquni məskunlaşmanın nəticələri aradan qaldırılmalıdır”.
Bunu da brifinqdə Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib.
H. Hacıyev deyib ki, BMT Təhlükəsizlik Şurasının da Kəlbəcərlə bağlı xüsusi qətnaməsi var: “Ərazini tərk edən ermənilər Kəlbəcərdəki mülki obyektləri yandırır, bu, xarici medianın görüntülərində də əksini tapır. Ermənilər ətraf mühitə və mülki obyektlərə ziyan vururlar. Ətraf mühitə vurulan zərərlər, ekoloji terrorun qarşısı alınmalıdır. Ərazidə tikilmiş tikililər də qeyri-qanunidir. Son məqamda da bu ərazilərin işğaldan azad edilməsi prosesində maddi mədəniyyət abidələrinə zərərlərin vurulması həyata keçirilir.”
Prezidentinin köməkçisi qeyd edib ki, Ermənistanın Kəlbəcərdən çıxması da vandalizm aktları ilə müşahidə olunmaqdadır.
Müsavat başqanı Amnistiya qanunun qəbulunu təklif edir
“Humanistlik yalnız ölkəmizi yağmalayanlara aiddir?”
Bu sualı isə Kəlbəcər rayonun boşaldılması ilə bağlı Ermənistan tərəfinə əlavə 10 gün verilməsinə münasibət bildirərkən Müsavat Partiyasının başqanı Arif Hacılı ifadə edib.
O daha sonra məsələ ilə bağlı Azadlıq Radiosuna açıqlamasında deyib:
“17 noyabr Milli Dirçəliş Günü ərəfəsində bir humanist addım da böyük amnistiya qanunu ilə siyasi və digər məhbuslarımız üçün gəlsin.
Gözləyirik”
Azərbaycanın birçox hüquq müdafiəçilərinin fikrincə, ölkədə 100-dən çox siyasi məhbus var.Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyir ki,siyasi məhbus siyahılarında yer alan insanlar sırf törətdikləri əmələ görə, məsuliyyətə cəlb ediliblər.
Azərbaycan və Rusiya nazirləri danışıblar
Bu gün, noyabrın 15-də Azərbaycan xarici işlər naziri Ceyhun Bayramov ilə Rusiya xarici işlər naziri Sergey Lavrovun telefon danışığı baş tutub.
Bu barədə Azərbaycan Xarici İşlər Nazirliyi (XİN) məlumat yayıb.
“Tərəflər bölgədə mövcud olan son durumu, 10 noyabr tarixli üçtərəfli bəyanatın icrasını, razılaşmadan irəli gələn bir sıra məsələlərin, o cümlədən humanitar xarakterli tədbirlərin reallaşmasında əlaqələndirmənin həyata keçirilməsi ilə bağlı fikir mübadiləsi aparıblar.”,XİN bildirir
Məlumata görə, nazirlər, həmçinin qarşılıqlı maraq doğuran digər məsələləri müzakirə ediblər.
Lavrov daha sonra Ermənstanın xarici işlər naziri ilə də danışıb. Rusiya XİN-in rəsmi internet saytında yer alan xəbərdə qeyd olunur ki, Lavrov noyabrın 9-da imzalanan sənəddə yer alan məsələlərin gedişi ilə bağlı erməni həmkarını məlumatlandırıb.