Prezident: “30 ilə yaxın mənasız danışıqlar...”
“30 ilə yaxın mənasız danışıqlar bizi heç bir nəticəyə yaxınlaşdırmadı. Əzəli tarixi torpaqlarımız 30 ilə yaxın işğal altında qaldı. Danışıqlar prosesində Ermənistan tərəfi, sadəcə olaraq, vaxt udmaq istəyirdi, sadəcə olaraq, status-kvonu möhkəmləndirmək, əbədi etmək istəyirdi. Bu illər ərzində dəfələrlə Azərbaycana müxtəlif güc mərkəzlərindən göndərilən siqnallar bizi vəziyyətlə barışmağa sövq edib. Ancaq biz qətiyyət, cəsarət, siyasi iradə göstərərək Azərbaycan xalqının maraqlarına cavab verməyən heç bir razılaşmaya getmədik.”
AZƏRTAC-ın xəbərinə görə, bu fikirləri prezident İlham Əliyev Şəhidlər xiyabanından xalqa etdiyi müraciətdə deyib.
“Mən dəfələrlə bütün beynəlxalq kürsülərdən bəyan etmişdim ki, torpaqlarımızın, ərazi bütövlüyümüzün bərpa edilməsi bizim əsas vəzifəmizdir və biz bu vəzifəni icra edirik. Danışıqlar heç bir nəticə vermədi. Sadəcə olaraq, bizim başımızı aldadırdılar, sadəcə olaraq, məsələni dondurmaq istəyi müşahidə olunurdu...”, - deyə dövlət başçısı qeyd edib.
“Şuşa bütün Qafqazın incisidir”
“Şuşa 28 il yarım işğal altında idi. Şuşanın Azərbaycan tarixində xüsusi yeri vardır. Bu, bizim qədim, tarixi şəhərimizdir. Əsrlər boyu azərbaycanlılar Şuşada yaşayıb, qurub, yaradıb. Şuşa nəinki Azərbaycanın, bütün Qafqazın incisidir...”
Bu fikirləri də prezident İlham Əliyev Şəhidlər xiyabanından xalqa etdiyi müraciətdə qeyd edib.
Prezident: “Əziz Şuşa, biz qayıtmışıq!”
Predzident müraciətində habelə deyib ki, Şuşa işğal altına düşəndə “bizim əsas problemlərimiz o idi ki, ordu yox idi, rəhbərlik öz vəzifə borcunu yerinə yetirə bilmirdi ”:
“ Beynəlxalq müstəvidə Azərbaycan demək olar ki, bütün ölkələrlə münasibətləri gərginləşdirmişdi. Biz demək olar ki, təcrid edilmiş vəziyyətdə idik. Ancaq bu gün biz Ermənistanı təcrid edilmiş vəziyyətə saldıq. Bizim transmilli layihələrimiz regionda tamamilə yeni mənzərə yaratdı…”
Prezident deyib ki, hakimiyyətdə olduğu 17 il ərzində onun işimin əsas hissəsi ordu quruculuğuna həsr edilib. O, sonra da qeyd edib ki, torpaqları ancaq Azərbaycan əsgəri, Azərbaycan zabiti azad edir:
“Bax, belə ordu yaratmışıq biz! Deyirdik işğalçılara, deyirdik, düz yola gəlin, işğala son qoyun, hələ ki, gec deyil. Ona görə bizim bütün dövrlərdəki siyasətimiz birmənalı olub.”
Prezident əlavə edib ki, hər bir ölkənin özünümüdafiə hüququ var:
“Bu hüququ bizə BMT Nizamnaməsi verir...”
O, qeyd edib ki, hələ də işğal altında torpaqlar var, hələ də döyüşlər gedir.
Dövlət başçısı həmçinin vurğulayıb ki, Azərbaycan mülki vətəndaşlara qarşı heç vaxt müharibə aparmayıb. O deyib ki, sentyabrın 27 -dən Azərbaycan tərəfdən 93 mülki şəxs həlak olub, 400-dən çox mülki şəxs yaralanıb.
Prezident müraciətin sonunda da deyib:
“Əziz Şuşa, sən azadsan!Əziz Şuşa, biz qayıtmışıq!
Əziz Şuşa, biz səni dirçəldəcəyik!Şuşa bizimdir! Qarabağ bizimdir! Qarabağ Azərbaycandır!”
Əli Kərimli: “Ermənistan rəhbərliyi məğlubiyyətini etiraf etməlidir”
Azərbaycan Xalq Cəbhəsi Partiyasının (AXCP) sədri Əli Kərimli “bütün xalqımızın gözü aydın olsun” deyərək əlavə edib ki, əsgər və zabitləri təbrik edir.
Əli Kərimli bildirib ki, Ermənistan rəhbərliyi məğlubiyyətini etiraf etməlidir:
“Əgər tamamilə sağlam məntiqlərini itiməyiblərsə, Erməınistan hakimiyyəti bu şəkildə özlərinin və Azərbaycan gənclərinin məhv edilməsi siyasətini aparmamalıdır. Aydın məsələdir ki, Azərbaycan ordusu qat-qat güclüdür... Bütün torpaqlarımız azad olunacaq, nəyə görə minlərlə gıncin həyatı itirilməlidir, ermənilər bunu anlamalı və torpaqları azad etməlidirlər...”.
