“Gəncədə 10-dan artıq çoxmənzilli binaya ziyan dəyib.”
Azərbaycan Baş Prokurorluğu Gəncə şəhərinin atəşə tutulması ilə bağlı açıqlama yayıb.
Qurumun mətbuat xidmətindən bildiriblər ki, Ermənistan silahlı qüvvələri oktyabrın 11-də gecə saat 02 radələrində cəbhə zonasından kənarda yerləşən, Azərbaycanın ikinci böyük şəhəri olan Gəncənin mərkəzi hissəsində yerləşən çoxmənzilli yaşayış binalarını raket atəşinə tutub. Qeyd edildiyinə görə, nəticədə 3-ü qadın olmaqla 7 nəfər həlak olub ( Amma başqa rəsmi mənbələr ölü sayının artdığını bildirir.Onlar qeyd edirlər ki, dağıntılar altından xilasetmə işləri davam edir-red).
16-sı qadın, 6-sı azyaşlı olmaqla isə 34 nəfərin yaralandığı qeyd edilir: “Həmçinin 10-dan artıq çoxmənzilli binaya və 100-dən çox müxtəlif təyinatlı obyektə ziyan dəyib.”
Azərbaycan deyir ki, Ermənistan razılığı kobud şəkildə pozur
Cəbhədki mövcud vəziyyətlə bağlı Azərbaycan Xarici İşlər Nazirliyi (XİN) də oktyabrın 11-də açıqlama yayıb.
Açıqlamada qeyd edilib ki, Rusiyanın vasitəçiliyi ilə Azərbaycan və Ermənistan Xarici İşlər nazirlərinin Moskva görüşü nəticəsində oktyabrın 10-u saat 12.00-dan etibarən humanitar atəşkəsə riayət olunması razılığının əldə olunmasına baxmayaraq, qarşı tərəf bu razılığı kobud şəkildə pozmağa davam edir:
“Humanitar atəşkəsin müəyyən olunduğu vaxtdan dərhal sonra Azərbaycanın Ağdam və Tərtər rayonları Ermənistan silahlı qüvvələri tərəfindən artilleriya atəşinə tutulub. Bir neçə saat sonra isə Ermənistan silahlı qüvvələri cəbhənin Hadrut və Cəbrayıl istiqamətlərində hücum cəhdi göstərib.Suqovşan ərazisində erməni əsgərlərinin cəsədlərini yığan və üzərinə aydın şəkildə ağ bayraq sancılan sanitar maşının Ermənistan silahlı qüvvələri tərəfindən atəşə tutulması nəticəsində bir tibbi xidmət qulluqçusu ağır yaralanıb.”
XİN-in bildirməsinə görə, oktyabrın 11-də gecə saatlarında Azərbaycanın ikinci böyük şəhəri olan və cəbhə bölgəsindən xeyli kənarda yerləşən Gəncə şəhərini Ermənistan silahlı qüvvələri raket atəşinə məruz qoyub:
“ Bu hücum nəticəsində 7 mülki şəxs həlak olub, aralarında azyaşlı uşaqlar olmaqla, 34 nəfər yaralanıb.Ermənistan silahlı qüvvələrinin humanitar atəşkəs razılığından sonra dinc insanları və şəhərləri atəşə tutması barbarçılığın növbəti bariz nümunəsidir və Ermənistan rəhbərliyinin atəşkəs çağırışlarının riyakarlıqdan başqa bir şey olmadığını göstərir.”
Bəyanatın sonunda da yazılıb: “Ermənistanın bu təcavüzkar əməllərini qətiyyətlə pisləyir və beynəlxalq ictimaiyyəti işğalçı Ermənistanı beynəlxalq hüquqa və beynəlxalq öhdəliklərinə riayət etməyə məcbur etmək üçün qətiyyətli addımlar atmağa çağırırıq. Bölgədə yaranmış vəziyyətin tam məsuliyyəti Ermənistan siyasi-hərbi rəhbərliyinin üzərindədir.”
“ Gəncədə raket atəşi nəticəsində ölənlərin sayı 9-a çatıb”
Ermənistan silahlı qüvvələrinin Gəncədə yaşayış binalarını raket atəşinə tutması nəticəsində ölənlərin sayının 9-a çatdığı bildirilir.
Bu barədə Azərbaycan Baş Prokurorluğunun Mətbuat xidməti məlumat yayıb.
Məlumatda qeyd edilib ki, Ermənistan silahlı qüvvələri oktyabrın 11-i, gecə saat 02 radələrində cəbhə zonasından kənarda yerləşən, Azərbaycanın ikinci böyük şəhəri olan Gəncənin mərkəzi hissəsində yerləşən çox mənzilli yaşayış binalarını raket atəşinə tutması nəticəsində 4-ü qadın olmaqla 9 nəfər həlak olub.
