Baş Prokurorluq: “41 dinc sakin həlak olub, 205 sakin yaralanıb”
Azərbaycan Baş Prokurorluğu sentyabrın 27-dən (cəbhədə döyüşlər başlayandan ) oktyabrın 11-dək olan müddətdə mülki insanların itkisi ilə bağlı növbəti açıqlama yayıb.
Qurumun məlumatına görə, bu müddət ərzində Ermənistan silahlı qüvvələrinin açdığı atəşlər nəticəsində Azərbaycan tərəfdən 41 dinc sakin həlak olub, 205 sakin yaralanıb.
“Yararsız vəziyyətə düşmüş yaşayış evlərinin sayı 1 165, çoxmənzilli yaşayış binalarının sayı 57, mülki obyektlərin sayı isə 146 olub.”,məlumatda vurğulanıb.
Azərbaycan Müdafiə Nazirliyi (AMN) oktyabrın 11-də bəyanat yayıb.
Bəyanatda yazılıb ki, humanitar atəşkəs rejiminə əməl etməyən Ermənistan silahlı qüvvələri döyüş əməliyyatları aparılan ərazidən xeyli aralıda yerləşən şəhərləri, kəndləri raket və artilleriya atəşinə tutmaqda davam edir.
Məlumatda qeyd edilib ki, oktyabrın 10-u və 11-i müxtəlif saatlarda Gəncə, Mingəçevir şəhərləri, Goranboy, Tərtər, Ağdam, Ağcabədi, Füzuli, Cəbrayıl rayonlarının kəndləri atəşə məruz qalıb.
“Nəticədə xeyli sayda dinc sakin həlak olub və yaralanıb, mülki infrastruktura ciddi ziyan dəyib.Bölgədəki vəziyyətin gərginləşməsinə görə məsuliyyət tam şəkildə Ermənistanın siyasi və hərbi rəhbərliyinin üzərinə düşür.”,AMN bildirib
Prezidentin köməkçisi Gəncədidir
Oktyabrın 11-də Azərbaycan Prezidentinin köməkçisi Hikmət Hacıyev, Baş Prokuror Kamran Əliyev və başqa dövlət rəsmiləri Gəncə şəhərinə səfər edib.
Rəsmilər raket zərbələrinin vurulduğu ərazidə olub, vəziyyətlə yerində tanış olublar.
Hikmət Hacıyev: “Bu, Rusiya Federasiyasına qarşı hörmətsizlik kimi qiymətləndirilməlidir”
Prezidentin köməkçisi Hikmət Hacıyev Gəncədə yerli və xarici kütləvi informasiya vasitələri nümayəndələrinin suallarını cavablandırıb.
O deyib ki, qarşı tərəf humanitar atəşkəs rejiminin tələblərini kobudcasına pozaraq təkcə Gəncəni deyil, Mingəçevir və digər yaşayış məntəqələrini atəşə tutub.
AZƏRTAC-ın xəbərinə görə, H.Hacıyev sonra da deyib: “Bu, Ermənistanın dünya ictimaiyyətinə, o cümlədən Rusiya Federasiyasına qarşı hörmətsizliyi kimi qiymətləndirilməlidir. Rusiya Federasiyasının bilavasitə vasitəçiliyi ilə humanitar əsaslarla atəşkəsə dair fikirlər ortaya qoyulduğu halda Azərbaycan xalqına qarşı Ermənistan tərəfindən bu vandallıq və soyqırımı aktı həyata keçirildi. Beynəlxalq ictimaiyyət bu hadisələrə lazımi qiymət verməlidir”.