Ceyhun Bayramov Moskvaya gedəcəkmi
Azərbaycanın Xarici İşlər naziri Ceyhun Bayramovun dəvəti qəbul edərək Moskvaya gedəcəyi bəlli deyil.
ABŞ, Rusiya və Fransa rəsmiləri Cenevrədə danışıqlar aparıb, döyüşlərin dayandırılması, müharibənin genişlənməsinin qarşısını almağa çalışıblar.
Bayramovun oktyabrın 8-də iclasa qatılacağı gözlənirdi. Ancaq "Reuters" görüşün nəticələri haqda informasiya verilmədiyini, Ermənistanla Azərbaycan arasında birbaşa görüş planlaşdırılmadığını xəbər verir.
Oktyabrın 8-də Rusiyanın Baş naziri Mixail Mişustin də diplomatik fəaliyyətə qoşulub. Azərbaycanlı həmkarı Əli Əsədovla telefon söhbətində vəziyyətin sabitləşməsinin, danışıqların bərpasının vacibliyini vurğulayıb. Xəbəri TASS yayıb.
Ermənistan tərəfi oktyabrın 8-də Azərbaycanı Şuşada tarixi kilsəni bombalamaqda ittiham edib. Şəhər sakinləri Müqəddəs Xilaskar Kilsəsinin xaricinə və daxilinə ziyan dəydiyini deyirlər.
Azərbaycan Müdafiə Nazirliyi isə kilsəyə hücumu təkzib edib, ordunun tarix, mədəniyyət, xüsusilə dini bina və abidələri hədəfə almağını bildirir.
Mnatsakanyan Moskvaya gedir
Ermənistanın Xarici İşlər naziri Zöhrab Mnatsakanyan oktyabrın 9-da axşam Moskvaya getməyi planlaşdırır. Oktyabrın 8-də Rusiya Prezidenti Vladimir Putin Azərbaycan və Ermənistanın xarici işlər nazirlərini Moskvaya danışıqlara dəvət edib, Dağlıq Qarabağda əməliyyatları dayandırmağa çağırıb.
Putin deyib ki, əsirlərin və öldürülənlərin cəsədlərinin dəyişdirilməsi üçün əməliyyatlar dayandırılmalıdır.
TASS xəbər agentliyi Ermənistanın Rusiyadakı səfirinə istinadla xəbər verir ki, Mnatsakanyan Rusiyanın Xarici İşlər naziri S.Lavrovun vasitəçiliyi ilə vəziyyətlə bağlı məsləhətləşmələr aparacaq.
Evlərə mərmi düşüb
Füzuli rayonuna atılan raket və artilleriya mərmiləri nəticəsində Azərbaycan tərəfdən üç mülki şəxsin xəsarət aldığı bildirilir.
Bununla bağlı Baş Prokurorluğun mətbuat xidməti məlumat yayıb.
Məlumatda qeyd edilib ki, oktyabrın 9-u, səhər saat 8 radələrindən başlayaraq Füzuli rayonu müxtəlif istiqamətlərdən raket və artilleriya mərmilərindən intensiv atəşə tutulub: "Saat 9 radələrində Füzuli rayonu Qarabağ kənd sakinləri 1982-ci il təvəllüdlü Əsədov Samir Hidayət oğlu, 1958-ci il təvəllüdlü İbrahimov Nizami Cəfər oğlu və 1968-ci il təvəllüdlü Abbasov Alman Ənvər oğlu yaşadıqları evlərə mərmi düşməsi nəticəsində müxtəlif dərəcəli bədən xəsarətləri alaraq xəstəxanaya yerləşdirilib...".
Baş Prokurorluq oktyabrın 8-də açıqlamışdı ki, sentyabrın 27-dən, cəbhədə döyüşlər başlayandan bəri açılan atəşlər nəticəsində Azərbaycan tərəfdən mülki əhalidən 31 nəfər ölüb, 154 nəfər isə yaralanıb.