Bayramovla Mnatsakanyanın görüşü təsdiqləndi
Ermənistan və Azərbaycan oktyabrın 9-da Moskvada müzakirələrə qatılacaqlarını təsdiqləyiblər.
Məlumatı Rusiyanın Xarici İşlər Nazirliyi yayıb.
Kremlin oktyabrın 8-də bildirməsinə görə, Xarici İşlər naziri Sergey Lavrov danışıqlara vasitəçilik edəcək.
Yaralıların sayı 164-ə çatıb
Azərbaycan Baş Prokurorluğu oktyabrın 9-da cəbhədə mülki əhalinin itkiləri ilə bağlı növbəti açıqlama yayıb.
Qurumun mətbuat xidmətinin məlumatına görə, sentyabrın 27-dən hazırkı vaxtadək qarşı tərəfin silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən 31 mülki şəxs həlak olub, 164 nəfər yaralanıb.
"Bundan başqa, 142 mülki obyekt və 1054 yaşayış evi yarasız hala düşüb", - məlumatda yazılıb.
Bayramov Cenevrədə həmsədrlərlə danışıb
Dünən, oktyabrın 8-də Azərbaycan Xarici İşlər naziri Ceyhun Bayramovun Cenevrədə ATƏT-in Minsk qrupunun həmsədrləri ilə görüşü keçirilib.
Bu barədə oktyabrın 9-da Azərbaycan Xarici İşlər Nazirliyinin (XİN) mətbuat xidməti idarəsi məlumat yayıb. "Görüşdə münaqişənin həlli ilə bağlı Azərbaycanın mövqeyi qarşı tərəfin diqqətinə çatdırılıb. Rusiya tərəfinin təşəbbüsü ilə əlaqədar, nazir Ceyhun Bayramov 9 oktyabr tarixində Moskvaya işgüzar səfər edəcək", - məlumatda yazılıb.
Azərbaycan Qarabağ münaqişəsinin mərhələli plan çərçivəsində həllini istəyir. Rəsmi Bakının mövqeyinə görə, əvvəlcə Azərbaycanın işğal edilən bütün ərazilərindən işğalçı qüvvənin qoşunları çıxarılmalı, azərbaycanlı köçkünlər Dağlıq Qarabağa qayıtmalı, yalnız bundan sonra status məsələsi həll edilməlidir. Ermənistan tərəfi isə bunu qəbul etmir. Onlar bundan əvvəl münaqişənin paket halda həllinə tərəfdar olduqlarını açıqlayıblar.
Ermənistan da oktyabrın 9-da Moskvada müzakirələrə qatılacağını təsdiqləyib.
"Bərdə və Ağdam rayonları intensiv atəşə tutulur"
"Bərdə və Ağdam rayonlarının əraziləri hazırda intensiv atəşə tutulur".
Bu açıqlamanı Azərbaycan Müdafiə Nazirliyi oktyabrın 9-u saat 14 radələrində yayıb.