Putin döyüşlərin dayandırılmasına çağırıb
Rusiya prezidenti Vladimir Putin Dağlıq Qarabağ münaqişəsi ilə bağlı müraciət edib.
O tərəfləri döyüş əməliyyatlarını “humanitar mülahizələrlə” dayandırmağa çağırıb.
RIA Novosti Kremlin mətbuat xidmətinə istinadən xəbər verir ki, Putin oktyabrın 8-də Azərbaycan prezidenti İlham Əliyev və Ermənistanın baş naziri Nikol Paşinyanla silsilə telefon danışıqları aparıb.
Putin bildirib ki, regiondakı toqquşmaların, əsirlərin və meyitlərin dəyişdirilməsi üçün dayandırılması zəruridir.
Kremldən bunu da bildiriblər ki, “bu məsələ barəsində Rusiya XİN-in vasitəçiliyi ilə məsləhətləşmələrin keçirilməsi üçün Azərbaycan və Ermənistan xarici işlər nazirləri oktyabrın 9-da Moskvaya dəvət olunublar”.
Gecə bütün cəbhə boyu döyüşlər davam edib
Gecə ərzində bütün cəbhə boyu gərgin döyüşlərin getdiyi bildirilir.
Bu barədə oktyabrın 9-da səhər saat 9:42-də Azərbaycan Müdafiə Nazirliyi (MN) məlumat yayıb.
Məlumatda yazılana görə, döyüşlər Azərbaycan ordusunun üstünlüyü ilə davam edib.
"Oktyabrın 8-i günün ikinci yarısından başlayaraq 9-u səhərədək və gecə ərzində bütün cəbhə boyu gərgin döyüşlər davam edib", - məlumatda vurğulanıb.
MN Xankəndi şəhərinə də zərbələr endirdiyini qeyd edib.
Goranboy, Tərtər və Ağdam rayonları atəşə tutulur
Ermənistan silahlı qüvvələrinin Goranboy, Tərtər və Ağdam rayonlarını atəşə tutduğu bildirilir.
Bu barədə Azərbaycan Müdafiə Nazirliyi (MN) oktyabrın 9-u saat 10:40-da məlumat yayıb.
"Ermənistan silahlı qüvvələrinə qarşı Ordumuz adekvat tədbirlər görür", - məlumatda yazılıb.