AzadAvropa/AzadlıqRadiosu-nun Ermənistan xidmətinin çəkiliş qrupu Xankəndindən xəbər verir ki, oktyabrın 7-də şəhər Azərbaycan qüvvələri tərəfindən atəşə tutulub. Azərbaycan hakimiyyəti Xankəndində yalnız legitim hərbi hədəfləri vurduğunu bildirir.
Xankəndi (ermənilər Azərbaycanın işğal altına olan Dağlıq Qarabağ regionunun mərkəzinə Stepanakert deyirlər – red.) "merinin müavini" Suren Tamrazyanın deməsinə görə, şəhərin 50 minlik əhalisinin yarıya qədər ya daha təhlükəsiz kənd yerlərinə, ya da Ermənistana qaçıb.
***
Ermənistan və Azərbaycanla həmsərhəd İran prezidentinin sözlərinə görə, hər iki tərəfə “aydın və dəqiq şəkildə” bildirib ki, münaqişəni regional müharibəyə çevirməməlidirlər.
“Bu münaqişənin regional müharibəyə çevrilməməsi üçün çox diqqətli olmalıyıq, çünki bundan heç kəs faydalanmayacaq”, – Hassan Rohani oktyabrın 7-də dövlət televiziyasına bildirib.
Oktyabrın 6-da Azərbaycan Prezidenti İlham Əliyevlə danışmış Ruhani deyib ki, Tehranın vasitəçiliyini təklif edib.
Goranboy, Tərtər, Ağdam artilleriya atəşinə tutulur
Oktyabrın 8-i səhər saatlarından başlayaraq Ermənistan silahlı qüvvələrinin Goranboy, Tərtər, Ağdam rayonlarının kəndlərini artilleriya atəşinə tutduğu bildirilir.
Bu barədə məlumatı Azərbaycan Müdafiə Nazirliyi oktyabrın 8-də saat 8:00 radələrində yayıb.
"Ölən və yaralananlar var. Ordumuz adekvat tədbirlər görür", - məlumatda qeyd edilir.
Bərdə və Ağcabədinin kəndlərinin də atəşə tutulduğu deyilir
"Ermənistan silahlı qüvvələri Bərdə və Ağcabədi rayonlarının kəndlərini atəşə tutur".
Bu məlumatı Azərbaycan Müdafiə Nazirliyi oktyabrın 8-i saat 8:21-də yayıb.
"Azərbaycan Ordusu adekvat tədbirlər görür", -məlumatda qeyd edilir.
Goranboyda artilleriya zərbələrindən həlak olan var
Goranboy rayonunun Şahməmmədli kəndində ağır artilleriyadan mülki əhalidən ölən olduğu deyilir.
Bu barədə Azərbaycan Baş Prokurorluğu oktyabrın 8-də məlumat yayıb.
Məlumatda qeyd edilir ki, oktyabrın 8-də Ermənistanın hərbi-siyasi rəhbərliyinin göstərişi ilə Goranboy rayonun Şahməmmədli kəndinin ağır artilleriyadan atəşə tutulması nəticəsində kənd sakini 1957-ci il təvəllüdlü Türyan Quliyeva yaşadığı evdə həlak olub.
Qurumun oktyabrın 7-də yayılan məlumatında bildirilirdi ki, sentyabrın 27-də, cəbhədə döyüşlər başlayandan bəri Azərbaycan tərəfdən 30 mülki şəxs həlak olub, 140-dan çoxu yaralanıb.