Ceyhun Bayramov Hayko Maas ilə danışıb
Dünən, oktyabrın 7-də Azərbaycan Xarici İşlər naziri Ceyhun Bayramov ilə Almaniya Xarici İşlər naziri Hayko Maas arasında telefon danışığı baş tutub.
Azərbaycan Xarici İşlər Nazirliyinin (XİN) oktyabrın 8-də yaydığı məlumatda qeyd edilib ki, tərəflər arasında bölgədə mövcud olan vəziyyətlə bağlı fikir mübadiləsi aparılıb: "Almaniya xarici işlər naziri bölgədə baş verən gərginliyin alovlanmasından ciddi narahatlığını ifadə edib və məsələnin həlli üzrə siyasi dialoqun zəruriliyini vurğulayıb. Nazir Ceyhun Bayramov bölgədəki son gərginlik, xüsusən də Ermənistanın azərbaycanlı mülki şəxslərini və obyektlərini qəsdən atəşə tutması barədə qarşı tərəfə məlumat verib".
Açıqlamaya görə, C.Bayramov BMT Təhlükəsizlik Şurasının müvafiq qətnamələrinin yerinə yetirilməsinin bölgədə sülhün təmin edilməsi üçün mühüm şərt olduğunu qeyd edib. (1993-cü ildə qəbul edilən 4 qətnaməni nəzərdə tutur. Orada işğal edilən ərazilərin boşaldılması istənilib-red.)
Bərdə atəşə tutulur
Ermənistan silahlı qüvvələrinin Bərdə şəhərini atəşə tutduqları bildirilir.
Bu barədə Azərbaycan Müdafiə Nazirliyi oktyabrın 8-də saat 11:24-də məlumat yayıb.
"Bərdə "Toçka-U" kompleksindən atəşə tutulub"
"Bərdə ərazisi "Toçka-U" kompleksindən atəşə tutulub".
Bunu Azərbaycan Müdafiə Nazirliyi oktyabrın 8-i saat 13 radələrində yayıb.
"Oktyabrın 8-də səhər saat 10 radələrindən başlayaraq Ermənistan silahlı qüvvələri Bərdə rayonunu müxtəlif istiqamətlərdən raket və artilleriya mərmilərindən intensiv atəşə tutub".
Bu məlumatı isə Azərbaycan Baş Prokurorluğunun mətbuat xidməti yayıb.
Məlumata görə, saat 11 radələrində Bərdə şəhərinin mərkəzində yerləşən "Qədim Bərdə" restoranına raket düşməsi nəticəsində həmin vaxt orada olan iki nəfər şəxs müxtəlif dərəcəli bədən xəsarətləri alaraq xəstəxanaya yerləşdirilib: "Eyni zamanda, Bərdə şəhər 5 nömrəli tam orta məktəbin yaxınlığına düşmüş raketlər 5 nəfər şəxsin yaralanmasına səbəb olub…".