Əliyev Putinə zəng vurub
Azərbaycan prezidenti İlham Əliyev oktyabrın 7-də Rusiya prezidenti Vladimir Putinə zəng edib.
Bu barədə Azərbaycan prezidentinin mətbuat xidməti məlumat yayıb. Məlumata görə, Azərbaycanın dövlət başçısı V.Putini ad günü münasibətilə (68 yaşı tamam olur) təbrik edib, Rusiyanın inkişafı və firavanlığı naminə dövlətçilik fəaliyyətində ona yeni uğurlar, möhkəm cansağlığı arzulayıb.
"Telefon söhbəti zamanı dövlət başçıları Ermənistan-Azərbaycan Dağlıq Qarabağ münaqişəsi ilə əlaqədar yaranmış vəziyyəti müzakirə ediblər. Prezident İlham Əliyev və prezident Vladimir Putin Azərbaycan-Rusiya əlaqələrinin perspektivləri ilə bağlı məsələlər ətrafında fikir mübadiləsi aparıblar", - məlumata yazılıb.
Həlak olan mülki şəxslərin sayı 28-ə çatıb
Azərbaycan Baş Prokurorluğunun mətbuat xidməti cəbhə bölgəsində mülki əhalinin itkiləri ilə bağlı oktyabrın 7-də növbəti məlumat yayıb.
Baş Prokurorluğun mətbuat xidmətindən verilən məlumata görə, sentyabrın 27-dən hazırkı vaxtadək Ermənistan silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən 28 mülki şəxs həlak olub, 144 nəfər yaralanıb.
Amma Azərbaycanın başqa rəsmi qurumları mülki əhali arasında yaralı sayını daha çox göstərirlər.
Ermənistan Müdafiə Nazirliyinin sözçüsü Şuşan Stepanyan bu səhər bildirib ki, ötən gecə Dağlıq Qarabağdakı Ermənistan əsgərləri Cəbrayıldan cənub-şərq istiqamətində irəliləyən Azərbaycan bölümlərinin qarşısını alıblar, dəqiq raket-artilleriya atəşi ilə onları məğlub ediblər.
Azərbaycan sentyabrın 27-dən başlanan əməliyyatlarda hərbi itkiləri açıqlamır. Dağlıq Qarabağdakı separatçı hakimiyyət isə indiyədək 280 hərbçinin öldüyünü bildirib. Onlardan 40-nın ölümü bu gün təsdiqlənib.
Ermənistan Azərbaycanın qüvvələrini Araz çayı boyunca cəmləşdirdiyini deyir
Ermənistan ordusunun rəsmisi Azərbaycana İranla sərhədə, Dağlıq Qarabağdakı erməni mövqelərindən cənuba qüvvə cəmləmək taktikası ilə bağlı xəbərdarlıq edib. O, məqsədin İranla sərhəddə döyüşləri qızışdırmaq olduğunu iddia edib.
"Özəlliklə Qarabağ-Azərbaycan əməliyyatlarından cənubda Azərbaycan bölmələri Araz çayı boyunca böyük qruplarla cəmləşir, faktiki olaraq gizlənərək irəli getməyə cəhd edir", – Artsrun Ovannisyan oktyabrın 7-də səhər Facebook-da yazıb.
Ordu rəsmisi əməliyyatlar nəticəsində Azərbaycan tərəfinin geri çəkilməkdən, yaxud İrana qaçmaqdan başqa alternativi qalmayacağını istisna etməyib.
"Buna yol verməmək üçün, düşünürük ki, bütün bunları görən İran tərəfi Azərbaycanın bu dərəcədə qüvvə yığmasının qarşısını almalıdır", – Ovannisyan vurğulayıb.Oktyabrın 6-da Tehran İran ərazisinə hətta təsadüfən atəş açılmasına qarşı sərt tədbir görüləcəyini deyib.