Putin: "Bu, bir faciədir"
Rusiya prezidenti Vladimir Putin deyir ki, Rusiya Federasiyası Dağlıq Qarabağda əməliyyatları mümkün qədər tez dayandırmağa çağırır.
"İstənilən halda biz atəşi dayandırmağa və bunu mümkün qədər tez etməyə çağırırıq", – Putin "Rossiya 24" televiziyasına müsahibəsində deyib.
Rusiya prezidenti Qarabağdakı hadisələrin bir faciə olduğunu, Rusiyanın bundan çox narahat olduğunu bildirib: "Bu, bir faciədir. Biz çox narahatıq, çünki Azərbaycan, Ermənistan və Dağlıq Qarabağ ərazilərində yaşayan insanlar bizə yad deyil".
V.Putin Rusiyada təxminən iki milyon azərbaycanlının və iki milyondan çox erməninin yaşadığını qeyd edib.
Xındırıstanda mərmidən ölən olduğu bildirilir
Ağdam rayonunun Xındırıstan kənd sakininin mərmidən həlak olduğu deyilir.
Bu barədə Azərbaycan Baş Prokurorluğu oktyabrın 7-də məlumat yayıb.
Qurumun mətbuat xidmətindən bildiriblər ki, işğalçı ölkənin silahlı qüvvələri Ağdam rayonunu müxtəlif istiqamətlərdən atəşə tutub. Qeyd edilib ki, Xındırıstan kəndində yaşadığı evə mərmi düşməsi nəticəsində 1945-ci il təvəllüdlü Zərifə Əliyeva həlak olub.
Baş Prokurorluğun mətbuat xidmətindən bundan əvvəl verilən məlumata görə, sentyabrın 27-dən Ermənistan silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən 28 mülki şəxs həlak olub, 144 nəfər yaralanıb.
Yenidən atəşə tutulur
Ermənistan ordusunun Tərtər və Füzuli rayonlarının yaşayış məntəqələrini yenidən atəşə tutduğu bildirilir.
Bu barədə oktyabrın 7-si saat 14:45-də Azərbaycan Müdafiə Nazirliyi (AMN) məlumat yayıb.
'Döyüşlər dayanmalıdır'
Avropa Birliyinin xarici işlər və təhlükəsizlik siyasəti üzrə ali nümayəndəsi Jozep Borrel oktyabrın 7-də Avropa Parlamentinin Brüsseldəki iclasında Dağlıq Qarabağ münaqişəsinə toxunub.
"Mövqeyimiz aydındır: döyüşlər dayanmalıdır. Hər iki tərəf mənalı danışıqlara qoşulmalıdırlar. Son 30 il ərzində ATƏT-in Minsk qrupunun vasitəçiliyi ilə aparılan danışıqlar çox da uğurlu olmayıb... Münaqişənin hərbi yolla həlli yoxdur, xarici müdaxiləyə yol verilməməlidir", – diplomat vurğulayıb.