Ermənistanın Baş naziri Nikol Paşinyan oktyabrın 6-da "France Presse" agentliyinə müsahibəsində deyib ki, Türkiyə müttəfiqi Azərbaycana döyüşləri qızışdırması üçün tam dəstək verib.
"Türkiyənin fəal iştirakı olmadan bu müharibə başlamazdı", – Paşinyan bildirib.
Gecə cəbhədə döyüşlər davam edib
Oktyabrın 7-ə keçən gecə bütün cəbhə boyu döyüşlərin davam etdiyi bildirilir.
Bu barədə Azərbaycan Müdafiə Nazirliyi (AMN) oktyabrın 7-də səhər saat 9:02-də məlumat yayıb.
Məlumatda qeyd edilib ki, cəbhənin müxtəlif istiqamətlərində Azərbaycan qoşunları ötən günlərdə qazanılan nailiyyəti genişləndirmək məqsədilə döyüş əməliyyatları aparıb: "Qarşılıqlı artilleriya atışları qeydə alınıb".
H.Hacıyev: "Ermənistanın son raket hücumları…"
"Təmas xəttində vəziyyət gərginləşməzdən əvvəl Ermənistan açıq şəkildə Azərbaycanın vacib enerji infrastrukturunu- Mingəçevir su anbarını raket hücumları ilə təhdid etmişdi".
Bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Twitter-dəki hesabındakı paylaşımında bildirib.
O qeyd edib ki, Ermənistanın son raket hücumları bu ölkənin hərbi doktrinasının nə qədər aqressiv olduğunu bir daha təsdiqləyir.
Azərbaycan rəsmi qurumları bəyan ediblər ki, oktyabrın 6-də Ermənistanın hərbi-siyasi rəhbərliyinin göstərişi ilə Bakı-Tbilisi-Ceyhan neft kəmərinə Yevlax yaxınlığında raket zərbələri atılıb. Amma zərbələrin qarşısının alındığı bildirilir.
Ermənistan silahlı qüvvələrinin Tərtər, Bərdə Ağdam, Ağcabədi, Füzuli və Cəbrayıl rayonlarının kəndlərini atəşə tutduğu bildirilir
Bu barədə oktyabrın 7-si səhər 10-25 radələrində Azərbaycan Müdafiə Nazirliyi (AMN) məlumat yayıb.
"Ordumuz tərəfindən adekvat tədbirlər görülür", - məlumatda qeyd edilib.