İran prezidenti İlham Əlievə zəng vurub
İran prezidenti Həsən Ruhani oktyabrın 6-da Azərbaycan prezidenti İlham Əliyevə zəng edib.
Bu barədə Azərbaycan prezidentinin mətbuat xidməti məlumat yayıb.
Məlumata görə, Həsən Ruhani Ermənistan-Azərbaycan təmas xəttində silahlı qarşıdurmanın davam etməsindən ölkəsinin narahatlığını ifadə edib və münaqişənin tez bir zamanda sülh yolu ilə həll olunacağına ümidvar olduğunu bildirib.
“Prezident İlham Əliyev qeyd edib ki, Ermənistanın sentyabrın 27-dən başlamış və bu gün də davam edən hərbi təxribatı nəticəsində təmas xətti boyu yerləşən hərbi birləşmələrimizin mövqeləri və yaşayış ərazilərimiz Ermənistan tərəfindən ağır artilleriya atəşinə məruz qalıb. Nəticədə hərbi qulluqçularımız, 27 mülki şəxsimiz həlak olub, 170-dən çoxu yaralanıb, 900-dən artıq evə ziyan dəyib və ya tamamilə dağıdılıb” - məlumatda yazılıb.
Açıqlamaya görə, İlham Əliyev əlavə edib ki, Azərbaycan tərəfi uğurlu əks-hücum əməliyyatları həyata keçirərək, işğal olunmuş torpaqların bir hissəsini azad edib:
“Dövlətimizin başçısı qeyd edib ki, İran-Azərbaycan dövlət sərhədinin işğal olunmuş ərazisinin bir hissəsi Azərbaycanın nəzarətinə keçib və sərhədboyu işğaldan azad olunmuş ərazilərdə tezliklə Azərbaycan sərhəd qoşunlarının və sərhəd infrastrukturunun yerləşdirilməsi nəzərdə tutulur.”
‘Bakı-Tbilisi-Ceyhan neft kəmərinə raket zərbələri endirilib’
Bakı-Tbilisi-Ceyhan neft kəmərinin hədəf alındığı bildirilir.
Bu barədə oktyabrın 6-da Azərbaycan Baş Prokurorluğu məlumat yayıb.
Qurumdan bildirilib ki, Ermənistanın hərbi-siyasi rəhbərliyinin göstərişi ilə işğalçı ölkənin silahlı qüvvələri oktyabrın 6-da saat 21 radələrində regionun ən böyük strateji layihəsi, Avropanın enerji təhlükəsizliyi sahəsində mühüm yer tutan Bakı-Tbilisi-Ceyhan neft kəmərini hədəfə alıblar.
Açıqlamaya görə, kəmərin Yevlax rayonu ərazisindən keçən hissəsinə raket zərbələri endirilsə də, Azərbaycan ordusunun tədbirləri nəticəsində həmin terror cəhdinin qarşısı alınıb.
Qurumun mətbuat xidmətindən habelə bildirilib ki, oktyabrın 6-da saat 21 radələrində Tərtər rayonunun müxtəlif istiqamətlərdə intensiv atəşə tutması nəticəsində rayonun Qaynaq kənd sakini 1981-ci il təvəllüdlü Həsən Asif oğlu Məmmədov həlak olub.
“Həmin kənd sakini 1989-cu il təvəllüdlü Əliyev Dəyanət Qənimət oğlu və Köçərli kənd sakini 1968-ci il təvəllüdlü Həsənov Seyfulla Yaqub oğlu müxtəlif dərəcəli bədən xəsarətləri alaraq xəstəxanaya yerləşdirilib” - qurum bildirib.
Bundan əvvəl, oktyabrın 6-da prezident İlham Əliyev İranın prezidenti Həsən Ruhani ilə telefon danışığında demişdi ki, son günlər açılan atəşlər nəticəsində Azərbaycan tərəfdən 27 mülki şəxs həlak olub, 170-dən çoxu yaralanıb, 900-dən artıq evə ziyan dəyib və ya tamamilə dağıdılıb.
"Bizim gərəkərsə bir dövlət kimi hərəkət edəcəyimizə şübhə olmasın. Türkiyə Azərbaycandır, Azərbaycan Türkiyədir", – Türkiyənin Xarici işlər naziri Mövlud Çavuşoğlu oktyabrın 6-da tvitində yazıb.
Ermənistanın Müdafiə Nazirliyi BTC-nin vurulması ilə bağlı deyilənləri təkzib edib.
"Ermənistan qüvvələrinin Bakı-Tbilisi-Ceyhan kəmərini vurmağa cəhd göstərməsi barədə deyilənlər ağ yalandır. Biz dəfələrlə demişik ki, neft və qaz infrastrukturu hədəfimiz deyil", – Ermənistan Müdafiə Nazirliyinin mətbuat katibi Şuşan Stepanyan Facebook səhifəsində yazıb.
Stepanyan oktyabrın 6-da Xankəndinin raket atəşinə tutulduğunu, Azərbaycan qüvvələrinin cənub cəbhəsi boyunca irimiqyaslı hücuma keçdiyini vurğulayıb.