14 yaşlı uşağın dağıntılar altında qaldığı bildirilir
Oktyabrın 4-də günün ikinci yarsı Azərbaycan Baş Prokurorlugu cəbhədə mülki əhalinin itkiləri ilə bağlı növbəti açıqlama yayıb.
Baş Prokurorluğun mətbuat xidmətindən bildiriblər ki, Ermənistan silahlı qüvvələri Ağcabədi rayonunu növbəti dəfə ağır artilleriyadan atəşə tutub. Qeyd edilib ki, oktyabrın 4-də saat 15 radələrində yeməkxanaya top mərmilərinin düşməsi nəticəsində orada olan Taynaq kənd sakini 2006-cı il təvəllüdlü Fərid Dilafət oğlu İsgəndərov dağıntılar altında qalaraq həlak olub.
Rəsmi qurumlar bundan əvvəl bildiriblər ki, sentyabrın 27-də cəbhədə döyüşlər başlayandan bəri Azərbaycan tərəfdən mülki əhalidən 24 nəfər qarşı tərəfin atəşləri nəticəsində həlak olub, 111 nəfər yaralanıb.
Ceyhun Bayramov Endryu Şofer-lə danışıb
Oktyabrın 4-də Azərbaycan Xarici İşlər naziri Ceyhun Bayramovun təşəbbüsü ilə onun ATƏT-in Minsk Qrupunun ABŞ-dan olan həmsədri Endryu Şofer arasında telefon danışığı baş tutub.
Bu barədə Azərbaycan Xarici İşlər Nazirliyi (XİN) məlumat yayıb.
Qeyd edilib ki, Ceyhun Bayramov Amerikalı həmsədrə bölgədəki yüksək gərginlik, xüsusən də Ermənistanın mülki şəxsləri və obyektləri məqsədyönlü atəşə tutması barədə məlumat verib.
XİN-in bildirməsinə görə, O eyni zamanda vurğulayıb ki, Ermənistan ərazisindən Azərbaycanın ikinci ən böyük şəhəri olan Gəncə raket atəşinə tutulub.
Açıqlamaya görə, Endryu Şoferə məlumat verilib ki, sentyabrın 27-dən bəri Ermənistan silahlı qüvvələrinin açdığı atəş nəticəsində 24 mülki şəxs həlak olub, 111 nəfər isə yaralanıb.
“Bölgədəki gərginliyin artmasından ciddi narahatlığını ifadə edən Endryu Şofer, atəşkəsə riayət edilməsinin əhəmiyyətini vurğulayıb.
Nazir Ceyhun Bayramov, BMT Təhlükəsizlik Şurasının müvafiq qətnamələrinə uyğun olaraq, Ermənistanın bütün silahlı qüvvələrinin Azərbaycanın işğal olunmuş ərazilərindən çıxarılmasının bölgədə sülhün təmin olunması baxımından zəruri olduğunu bildirib.”, məlumatda yazılıb.
C.Bayramov oktyabrın 4-də ATƏT-in Minsk Qrupunun Rusiya və Fransadan olan həmsədrləri ilə də danışmışdı.
“Cəbrayıl şəhəri və rayonun 9 kəndi işğaldan azad edilib”
Bunu Azərbaycan prezidenti İlham Əliyev bu gün, oktyabrın 4-də xalqa müraciətində bəyan edib.
Prezident İlham Əliyev Cəbrayıl və digər ərazilərin azad edilməsində fəal iştirak etmiş bütün əsgər və zabitləri ürəkdən təbrik etdiyini vurğulayıb.
O, daha sonra Cəbrayil rayonunda azad edildiyini bildirdiyi kəndlərin adını açıqlayıb.” Bu gün şanlı Azərbaycan Ordusu aşağıdakı yaşayış məntəqələrini azad edib. Cəbrayıl şəhəri, Karxulu kəndi, Şükürbəyli kəndi, Yuxarı Maralyan kəndi, Çərəkən kəndi, Daşkəsən kəndi, Horovlu kəndi, Decal kəndi, Mahmudlu kəndi, Cəfərabad kəndi...”, - deyə dövlət başçısı bildirib.
Prezident Əliyev: “Mənim şərtim birdir”
Prezident İlham Əliyev oktyabrın 4-də xalqa müraciətində Azərbaycanın Ermənistan rəhbərliyinə şərtindən də danışıb.
“Mənim şərtim birdir - çıxsın bizim torpaqlarımızdan, çıxsın, qarşıdurma dayansın ”, AZƏRTAC-ın xəbərinə gprə, deyə o vurğulayıb.
Prezidentin qeyd etməsinə görə, amma bunu sözdə yox, əməldə göstərməlidir:
“ Desin ki, mən Azərbaycanın ərazi bütövlüyünü tanıyıram, necə ki, baza prinsiplərində bu, təsbit edilib. Desin ki, mən işğal edilmiş torpaqlardan qoşunlarımızı çıxaracağam, necə ki, baza prinsiplərində bu, təsbit edilib. Desin ki, mən Azərbaycan xalqından üzr istəyirəm və desin ki, Qarabağ Ermənistan deyil. Sonuncu şərt budur ki, qrafik versin, işğal edilmiş torpaqlardan erməni silahlı qüvvələrinin çıxarılması cədvəli verilsin bizə. Onda biz əlbəttə ki, atəşkəs rejimini bərpa edəcəyik. Halbuki, indi şiddətli döyüşlər getdiyi zaman bunu etmək çətindir.”
“Bizi belə sadəlövh sayırlar bunlar?”
Prezident əlavə edib ki, “biz dayansaq, onlar dayanmayacaq”:
“Amma hər halda, bunun üzərində işləmək olar. Yoxsa ki, siz dayanın, onlara vaxt verin. Nəyə vaxt verək? Vaxt verək ki, güc toplasınlar? Vaxt verək ki, yenə də adam toplasınlar bizə hücum etsinlər? Bizi belə sadəlövh sayırlar bunlar? Vaxt verin ki, bunlar gəlsinlər danışıqlara. Mən nə lazımdır dedim, vəssalam.”
Prezidentin sözlərinə görə, Cəbrayılın işğaldan azad edilməsi Ermənistana, onun havadarlarına dərs olmalıdır:
“ …Biz haqq-ədalət tərəfindəyik. Biz tarixin ən şərəfli anlarını yaşayırıq. Azərbaycan xalqı qədim xalqdır. Bizim tariximizdə bir çox şərəfli anlar olub, hadisələr olub, qələbələr olub. Onların sırasında bugünkü hadisələr xüsusi yerdədir. Biz ədaləti bərpa edirik, ərazi bütövlüyümüzü bərpa edirik, Azərbaycan xalqının ümidlərini doğrulduruq və bundan sonra da doğruldacağıq. Biz haqlıyıq, biz zəfər çalacağıq! Qarabağ bizimdir, Qarabağ Azərbaycandır!”