Cəbhədə oktyabrın 28-nə olan son vəziyyət
Ermənistan silahlı qüvvələrinin oktyabrın 27-si gün ərzində və 28-nə keçən gecə cəbhənin müxtəlif istiqamətlərində Azərbaycan ordusu bölmələrinin yerləşdiyi mövqeləri, cəbhəboyu zonaya yaxın yaşayış məntəqələrini müxtəlif silahlardan atəşə tutduğu bildirilir.
Bununla bağlı Azərbaycan Müdafiə Nazirliyi (MN) oktyabrın 28-i, saat 8:42-də məlumat yayıb.
Məlumatda vurğulanıb ki, qarşı tərəf humanitar atəşkəs rejiminə riayət etmir: "Döyüş əməliyyatları, əsasən, cəbhənin Ağdərə, Xocavənd, Füzuli, Zəngilan və Qubadlı istiqamətlərində davam edib".
Açıqlamaya görə, qarşı tərəfin hücum etmək cəhdlərinin qarşısı alınıb. "Hazırda qoşunlarımız əməliyyat şəraitinə nəzarət edir", MN qeyd edib.
Tərtər rayonu artilleriya atəşinə tutulub
Azərbaycan Müdafiə Nazirliyinin (MN) məlumatına görə, oktyabrın 28-də saat 07.30 radələrində Ermənistan silahlı qüvvələri Tərtər rayonunun ərazisini artilleriya atəşinə tutub.
Beynəlxalq təşkilatlar Azərbaycana dəvət edildi
Azərbaycan Human Rights Watch, Amnesty İnternational kimi beynəlxalq təşkilatlara müraciət edib.
Bunu bugün, oktyabrın 27-də prezidentin köməkçisi Hikmət Hacıyev Ermənistan Silahlı Qüvvələrinin Azərbaycanın Bərdə və Tərtər şəhərlərini “Smerç” raketindən atəşə tutması ilə bağlı məlumatı şərh edərkən bildirib.
Prezident köməkçisinin qeyd etməsinə görə, həmin təşkilatlara müraciət edilib ki, onların nümayəndələri gəlsinlər, obyektiv şəkildə Ermənistanın mülki insanlara qarşı ballistik raketlərdən və kasset bombalarından istifadə etmələri hallarını yerindəcə araşdırıb, hesabatlar hazırlayaraq beynəlxalq ictimaiyyətin diqqətinə çatdırsınlar.