‘İndiyə qədər 69 mülki şəxs həyatını itirib, 322-si yaralanıb...’
“Ermənistan və Azərbaycan arasında humanitar atəşkəsin əldə olunmasına baxmayaraq, Azərbaycana hücumlar davam edir”.
Bunu bugün, oktyabrın 27-də brifinqdə Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib.
Hikmət Hacıyev deyib ki, 26 oktyabr saat 08.00-dan - yeni humanitar atəşkəs qüvvəyə minəndən 5 dəqiqə sonra Azərbaycanın yaşayış məntəqələrini Ermənistan silahlı qüvvələri atəşə tutub :
“Bugün (oktyabrın 27-də) saat 16.40 radələrindən Bərdənin “Smerç” raketlərindən atəşə tutulması nəticəsində 1-i uşaq olmaqla, 4 nəfər həyatını itirib, yaralılardan da 4-ü uşaqdır. Bu, kassetli raketdir...”
Prezidentin köməkçisi qeyd edib ki, oktyabrın 27-də Ermənistan Müdafiə naziri Azərbaycana ağır zərbə endiriləcəyini bildirmişdi:
“Ancaq onlar hərbi qüvvələrə zərbə endirməkdə acizdirlər...”
Onun deməsinə görə, indiyə qədər (sentyabrın 27-də döyüşlər başlanandan bəri -red) Azərbaycan tərəfdən 69 mülki şəxs həyatını itirib, 322 mülki şəxs yaralanıb.
Nazirliyin açıqlamasında Bərdədə 13 nəfərin xəsarət aldığı bildirilir
“Ermənistan silahlı qüvvələri tərəfindən Azərbaycanın Bərdə rayonuna “Smerç” yaylım atəşli reaktiv sistemdən atılan raket atəşləri nəticəsində 4 nəfər mülki şəxs, o cümlədən azyaşlı uşaq həyatını itirib, aralarında uşaqlar və qadınlar olmaqla 13 nəfər ciddi xəsarət alıb”.
Bu məlumatı oktyabrın 27-də Azərbaycan Xarici İşlər Nazirliyinin Mətbuat xidməti yayıb:
“Bu, son günlər ərzində beynəlxalq vasitəçilərin davamlı səyləri ilə üçüncü dəfə razılaşdırılmış humanitar atəşkəs rejimini kobud şəkildə pozan Ermənistanın beynəlxalq humanitar hüquq öhdəliklərini heçə sayaraq törətdiyi növbəti müharibə cinayətidir”.
Açıqlamaya görə, iki ölkənin xarici işlər nazirlərinin Cenevrədə ATƏT-in Minsk Qrupunun həmsədrləri ilə keçirəcəyi görüşü ərəfəsində (oktyabrın 29-da gözlənilir) bu, Ermənistanın münaqişənin siyasi həllində maraqlı olmadığının və hər vəchlə danışıqlara maneə törətmək məqsədi güddüyünün bariz göstəricisidir:
“Azərbaycanın dinc əhalisinə qarşı insanlıq əleyhinə cinayətin törədilməsinə görə Ermənistanın siyasi-hərbi rəhbərliyi tam məsuliyyət daşıyır...”
'Bərdəyə raket hücumu nəticəsində ölənlərin sayı 4 nəfərə çatıb'
“Ermənistan silahlı qüvvələrinin Bərdəyə raket hücumu nəticəsində ölənlərin sayı 4 nəfərə çatıb”.
Bunu da Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “Twitter” hesabında bildirib.
Baş prokurorluq: 3 ölüm, 7 xəsarət
Baş Prokurorluq da oktyabrın 27-də Bərdə rayonunda 3 nəfərin həlak olması ilə bağlı açıqlama yayıb. Məlumata görə, oktyabrın 27-də günorta saatlarından başlayaraq Ermənistan silahlı qüvvələri Goranboy, Bərdə rayonlarını müxtəlif istiqamətlərdən intensiv raket və ağır artilleriyadan atəşə tutublar.
Məlumatda deyilir:
“... Saat 16 radələrində Bərdə rayonunun Qarayusifli kəndinin müxtəlif istiqamətlərdən ağır artilleriyadan atəşə tutulması nəticəsində dinc sakinlər - Cəfərova Ofeliya Məcid qızı, Əhmədova Aybəniz Əşrəf qızı və 2013-cü il təvəllüdlü İsgəndərova Aysu Rövşən qızı həlak olub, 7 nəfər isə xəsarət alıb”.
Baş prokurorluq buna qədər bildirmişdi ki, sentyabrın 27-dən ( cəbhədə döyüşlər başlayandan) Ermənistan silahlı qüvvələrinin yaşayış məntəqələrini atəşə tutması nəticəsində 65 mülki şəxs həlak olub, 297-i isə yaralanıb.