Pompeo Əliyev və Paşinyana zəng edib
ABŞ dövlət katibi Mike Pompeo Ermənistanın baş naziri Nikol Paşinyana və Azərbaycan prezidenti İlham Əliyevə zəng edib.
Bu barədə məlumatı Dövlət Departamentinin sözçüsü Morgan Ortagus yayıb.
Onun sözlərinə görə Pompeo Paşinyan və Əliyevlə ayrı-ayrılıqda danışıb.
Məlumatda deyilir ki, ABŞ dövlət katibi iki ölkənin liderlərini döyüş əməliyyatlarının dayandırlması və Dağlıq Qarabağ münaqişəsinin ATƏT-in Minsk qrupu vasitəsilə diplomatik həlli barədə öhdəliklərinə əməl etməyə çağırıb.
Pompeo vurğulayıb ki, bu münaqişənin hərbi yolla çözümü yoxdur.
Dövlət katibi oktyabrın 10-da Moskvada əldə olunmuş atəşkəs razılaşmasının tam şəkildə icrasının mühümlüyünü bir daha qeyd edib.
Bərdəyə raket hücumunda 3 mülki şəxs ölüb
"Ermənistan silahlı qüvvələrinin Bərdəyə xain raket hücumu nəticəsində 3 mülki şəxs ölüb, 10 nəfər yaralanıb".
Bunu Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Twitter hesabında bildirib.
"Xəsarət alanlar arasında qadınlar və uşaqlar var. Ermənistanın müharibə cinayətləri davam edir. Bu gün (oktyabrın 27-də) Ermənistanın Müdafiə Nazirliyi sərt hücumlar ediləcəyi barədə bəyanat vermişdi. Bununla onlar mülki şəxsləri – uşaqları və qadınları nəzərdə tuturdu", - H.Hacıyev qeyd edib.
Goranboy, Tərtər və Bərdə atəşə tutulur
Azərbaycan Müdafiə Nazirliyi (MN) oktyabrın 27-si, saat 17:30 radələrində bildirib ki, Ermənistan silahlı qüvvələri Goranboy, Tərtər və Bərdə rayonlarının ərazilərini raket atəşinə tutur.