Separatçılar ermənilərin Qarabağdan çıxmasına məhdudiyyət qoyur
AzadlıqRadiosunun Erməni xidmətinin verdiyi xəbərə görə Qarabağın separatçı rejiminin başçısı Araik Arutyunyan Dağlıq Qarabağ ərazisində adamların sərbəst hərəkətinə məhdudiyyət qoyub.
Arutyunyan özünün Facebook səhifəsində yazıb ki, onun imzaladığı “fərman” əsasən Dağlıq Qarabağdakı əhalinin oradan çıxmasının qarşısını almaq üçün verilib.
“Fərmanda” bu şəxslər “Artsax Respublikasının vətəndaşları” adlandırılır.
Separtaçıların lideri bildirir ki, adamların Dağlıq Qarabağdan çıxmasının qarşısının alınması üçün xüsusi kommendantlıq yaradılıb.
Sözü gedən “fərmanda” deyilir ki, bu məhdudiyyət separatçı ərazidə səfərbərlik yaşında olanlara şamil edilir.
Prezident 6 kəndin də işğaldan azad olunduğunu açıqladı
Azərbaycan prezidenti İlham Əliyev bu gün, oktyabrın 15-də 6 kəndin işğaldan azad edildiyini açıqlayıb.
"Rəşadətli Azərbaycan Ordusu tərəfindən Füzuli rayonunun Arış, Cəbrayıl rayonunun Doşulu, Xocavənd rayonunun Edişə, Düdükçü, Edilli, Çiraquz kəndləri işğaldan azad edilib...", - o, Twitter səhifəsində yazıb.
Mülki əhalidən ölü sayı 46-ya çatıb
Ermənistan silahlı qüvvələrinin bu gün, oktyabrın 15-də Tərtər qəbiristanlığını atəşə tutması nəticəsində üç mülki insanın həlak olduğu, beşinin isə yaralandığı bildirilir.
Bu barədə Baş Prokurorluğun mətbuat xidmətinin məlumatında bildirilir. Qurumdan verilən məlumata görə, saat 13 radələrində qarşı tərəfin Tərtər şəhər qəbiristanlığını dəfn mərasimi keçirilərkən qəsdən ağır artilleriyadan atəşə tutması nəticəsində orada olan üç nəfər həlak olub: "Məmmədov Fizuli Əli oğlu, Əmirov İsgəndər Yelmar oğlu, Allahverdiyev Elsevər Vəli oğlu, Əmirov Nofəl Yelmar oğlu və Qəzənfərli Rəfael Qəzənfər oğlu isə müxtəlif dərəcəli bədən xəsarətləri alaraq xəstəxanaya yerləşdiriliblər".
Qurumdan bunda öncə isə bildirmişdi ki, sentyabrın 27-dən (cəbhədə döyüşlər başlayandan) hazırkı vaxtadək Ermənistan silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən 43 mülki şəxs həlak olub, 218 nəfər yaralanıb.
