Yaşayış məntəqələri atəşə tutulur
"Oktyabrın 13-dən 14-ə keçən gecə cəbhənin Ağdərə-Ağdam və Füzuli-Hadrut-Cəbrayıl istiqamətlərində vəziyyət gərgin olaraq qalıb".
Bu məlumatı AMN oktyabrın 14-ü saat 8:48-də yayıb.
Məlumata görə, Ermənistan silahlı qüvvələrinin bölmələri gecə ərzində cəbhənin bəzi istiqamətlərində Azərbaycan ordusunun mövqelərinə basqın edib və görülən tədbirlər nəticəsində geri oturdulub: "Səhər saatlarından başlayaraq Tərtər, Ağdam və Ağcabədi rayonlarının ərazisi artilleriya atəşinə tutulur. Ordumuz tərəfindən adekvat tədbirlər görülür. Humanitar atəşkəs rejiminə əməl edən qoşunlarımız bütün cəbhə boyu əməliyyat üstünlüyünü saxlayır".
Raketlərin vurulduğu bildirilir
Oktyabrın 14-ü saat 08:36 radələrində Ermənistanın Azərbaycanın işğal olunmuş Kəlbəcər rayonuna yaxın sərhədyanı ərazilərində həmin ölkənin silahlı qüvvələrinin növbəti əməliyyat-taktiki ballistik raket kompleksini start vəziyyətinə gətirdiyi bildirilir.
Bu barədə oktyabrın 14-ü səhər saatlarında Azərbaycan Müdafiə Nazirliyi (AMN) məlumat yayıb: "Mülki insanlar arasında tələfata səbəb olmaq, mülki infrastruktura xələl yetirmək məqsədilə operativ-taktiki raketlər Gəncə, Mingəçevir və digər şəhərlərə doğru hədəflənmişdi".
Məlumatda sonra da qeyd edilib ki, mülki insanların təhlükəsizliyini təmin etmək məqsədilə legitim hərbi hədəf kimi start vəziyyətində olan raketlər qabaqlayıcı dəqiq zərbə ilə vurulub.
Nazirlik bildirib ki, bundan əvvəl saat 01:00 radələrində həmin istiqamət üzrə start vəziyyətinə gətirilmiş əməliyyat-taktiki raket kompleksləri də dəqiq zərbə ilə vurulmuşdu: "Raketlərin atəş vəziyyətinə gətirildiyi məntəqələrdə hər hansı mülki infrastruktur və obyektlər olmayıb".
Çavuşoğlu: Atəşkəslə torpaqların azad olunmasına birgə çağırış edilməlidir
Türkiyənin xarici işlər naziri Mevlut Çavuşoğlu oktyabrın 13-də deyib ki, Dağlıq Qarabağda atəşkəsə çağırışlar başa düşüləndir, lakin bu çağırışa Ermənistanın Azərbaycan torpaqlarından çıxması tələbi də daxil edilməlidir.
Reuters agentliyinin xəbərinə görə Ankarada isveçli həmkarı Ann Linde ilə birgə keçirdiyi mətbuat konfransında Çavuşoğlu deyib ki, bu məsələdə Dağlıq Qarabağ münaqişəsinin tənzimlənməsi üçün yaradılmış ATƏT-uin Minsk qrupunun üzvü olan 11 ölkənin birgə keçirəcəyi iclas faydalı ola bilər.
11 ölkə sırasına Türkiyə də daxildir. Minsk qrupuna Rusiya, ABŞ və Fransanı təmsil edən həmsədrlər başçılıq edirlər.
Həmsədrlər hesabat versinlər
Çavuşoğlu deyib:
“Biz atəşkəsə edilən beynəlxalq çağırışları düzgün hesab edirik. Amma biz beynəlxalq icmanın bu problemi həll etmək istəyini o vaxt görəcəyik ki, eyni zamanda Ermənistanın Azərbaycan torpaqlarından çıxması da tələb olunacaq”.
Çavuşoğlu deyib ki, Minks qrupunun tam heyətdə iclasının keçirilməsini xanım Lindeyə təklif edib, çünki İsveç tezliklə ATƏT-ə sədrliyi qəbul edəcək.
“Minsk qrupunun bütünlükdə iclas keçirməsi faydalı olardı. Belədə Minsk qrupunun həmsədrləri qrup qarşısında hesabat verərdilər və lazımi addımlar atılardı”.