Baş Prokurorluq: Beyləqanda 2 dinc sakin həlak olub

Cəbhə bölgəsindən mülkü insanların həlak olması ilə bağlı xəbərlər gəlməkdə davam edir. Baş Prokurorluğun mətbuat xidməti oktyabrın 4-də bununla bağlı növbəti açıqlama yayıb.

Məlumatda bildiriblər ki, Ermənistan silahlı qüvvələri Beyləqan şəhərinin müxtəlif istiqamətlərində dinc əhalinin evlərini növbəti dəfə ağır artilleriyadan atəşə tutub.Açıqlamaya görə, oktyabrın 3-də saat 19 radələrində 1976-cı il təvəllüdlü şəhər sakinləri Zülfiyyə İsgəndər qızı İsmayılova və bacısı 1998-ci il təvəllüdlü Arzu İsgəndər qızı Əsədova yaşadıqları evə çoxsaylı top mərmilərinin düşməsi nəticəsində dağıntılar altında qalaraq həlak olublar:

“Eyni zamanda, şəhərin müxtəlif yerlərinə düşmüş top mərmilərinin qəlpələrindən 1982-ci il təvəllüdlü şəhər sakinləri Balakişiyev Etibar Təvəkkül oğlu və 1969-cu il təvəllüdlü Bəşirova Sevda Yaşar qızı müxtəlif dərəcəli bədən xəsarətləri alaraq xəstəxanalara yerləşdirilib”

Tərtərdə də yaralanan var

Qurum habelə bildirir ki, oktyabrın 3-də saat 21 radələrində Tərtər rayonu Azad Qaraqoyunlu kəndinə düşmüş top mərmilərinin qəlpələrindən 1966-cı il təvəllüdlü Səfər Əyyub oğlu Məmmədov və Akif Yunis oğlu Quliyev müxtəlif dərəcəli bədən xəsarətləri alaraq xəstəxanalara yerləşdiriliblər.

Azərbaycanın rəsmi qurumları bundan öncə bildirmişdilər ki, sentyabrın 27-dən, cəbhədə döyüşlər başlayandan bəri onlar tərəfdən mülkü əhalidən 19 nəfər ölüb, 65 nəfər yaralanıb.

Döyüşlərin davam etdiyi bildirilir

Xankəndi şəhərinin şimalından Azərbaycan Ordusu bölmələrinin mövqeləri və yaşayış məntəqələrinin son iki gün ərzində intensiv atəşə tutulduğu bildirilir.

Bu məlumatı oktyabrın 4-də saat 80-40-da Azərbaycan Müdafiə Nazirliyi (AMN) yayıb.

Məlumatda qeyd edilib ki, beynəlxalq təşkilatların nümayəndəlikləri vasitəsilə qarşı tərəfə bir neçə dəfə xəbərdarlıq edilməsinə baxmayaraq bu hələ də davam edir.AMN vurğulayıb ki, buna qarşı adekvat tədbirlər görüləcək.

Nazirliyin bu məlumatdan dəqiqələr sonra yaydığı açıqlamada isə yazılıb ki, Ermənistan silahlı qüvvələri hazırda Xankəndi ərazisindən Tərtər şəhərini və Füzuli rayonunun Horadiz şəhərini raket atəşinə tutur.
Azərbaycan Ordusunun adekvat cavab tədbirləri görüyü bildirilir.

Xatırlatma

Azərbaycan və Ermənistan silahlı qüvvələrinin təmas xəttində sentyabrın 27-dən ağır döyüşlərin getdiyi bildirilir. Hər iki tərəfdən itkilər olduğu deyilir. Azərbaycan açıqlayıb ki, son günlər 14 kəndi və bəzi strateji yüksəklikləri işğaldan azad edib.

Qarabağ münaqişəsi Ermənistanın Azərbaycana ərazi iddiaları ilə 1988-ci ildəbaşlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilib. Atəşkəs olsa da, tez-tez onun pozulduğu bildirilir. Xüsusilə 2016-cı ilin aprelində və bu ilin iyulunda cəbhədə ağır silahların işə düşdüyü, hər iki tərəfdən itkilər olduğu deyilirdi.
Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.Oktyabrın 1-də bu qurumun həmsədr ölkələrinin liderləri birgə bəyanat yayaraq tərəfləri hərbi əməliyyatları dayandırıb, ilkin şərtsiz sülh danışıqlarını bərpa etməyə çağırıb.

Prezident: “Azərbaycan Ordusu daha bir neçə kəndi işğalda azad edib”

“Bu gün ( oktyabrın 3-də) Azərbaycan Ordusu Tərtər rayonunun Talış kəndini, Cəbrayıl rayonunun Mehdili, Çaxırlı, Aşağı Maralyan, Şəybəy və Quycaq kəndlərini, Füzuli rayonunun Aşağı Əbdürrəhmanlı kəndini azad edib.Qarabağ Azərbaycandır!”

Bunu da Azərbaycan Prezidenti İlham Əliyev özünün rəsmi “Twitter” səhifəsində yazıb

O, bir neçə saat əvvəl isə Madagizin işğaldan azad olunması ilə bağlı məlumat açıqlamışdı.Daha sonra isə həmin kəndin adını dəyişdiyini bildirmişdi.“2020-ci il oktyabrın 3-dən Madagizin tarixi adını bərpa edirəm. Bundan sonra Suqovuşan adlandırılır”, deyə o yazmışdı.

Suqovşan (Madagiz) Tərtər rayon Çaylı kənd inzibati ərazi dairəsində kənddir.

Əvvəl bu kənd Ağdərə rayonuna daxil olub.Sonra Ağdərə rayonu ləğv edildiyindən Tərtər rayonun ərazisinə verilib.

1992-ci ildə işğaldan azad edilmişdi.1994-cü ilin aprelində yenidən işğala məruz qalmışdı.