Fevralın 26-sı səhər saatlarında Astara sərhəd-gömrük məntəqəsinin önündə sakitlik idi. Az adam gözə dəyirdi. Məntəqənin giriş qapısında üç-dörd nəfər vardı. Onlar, demələrinə görə, İrana müalicəyə getmək istəyirdilər. Həmin şəxslərdən biri qeyd etdi ki, hər üç aydan bir Ərdəbildə olan və onu müalicə edən həkimə baş çəkir:
«Müalicəyə gedənlər İrana buraxılır»
«Məni əməliyyat edib, ehtiyacım var. Səhərdən burdayam. Hər dəfə deyirlər ki, gözlə».
Barmaqlıqların o tayında olan sərhədçilər isə elan edirdilər ki, müalicəyə gedənlər İrana buraxılırlar. İran vətəndaşları isə müəyyən prosedurdan sonra içəriyə keçirdilər.
Buna da bax: Gürcüstana Azərbaycandan keçməklə İrandan gələn şəxsdə koronovirus tapılıb
«Yüzlərlə İran vətəndaşı keçib»
Çıxış qapısının önündə isə adamlar toplaşmışdı. Burda müştəri gözləyən taksi sürücüləri deyirdi ki, fevralın 25-də Azərbaycan tərəfinə yüzlərlə İran vətəndaşı keçib. Taksi sürücüsünün vurğulamasına görə, onlar Bakıya gediblər.
İrandan gələn iki nəfər Pakistan vətəndaşı da taksi sürücüsünə yaxınlaşdı. Onlardan Azərbaycana nə məqsədlə gəldiklərini soruşuruq. Dedilər ki, bu, işgüzar səfərdir. Taksi sürücüsü deyirdi ki, İran və digər ölkələrin vətəndaşları maneəsiz olaraq Azərbaycana gələ bilirlər.
Mağazalar bağlıdır. 26 fevral 2020
Mağazaların çoxu bağlıdır
Sərhədyanı ərazidə fəaliyyət göstərən mağazaların çoxu isə bağlıdır. Sahibkarların bəziləri koronavirus təhlükəsindən uzaq olmaq üçün mağazalarını bağladıqlarını deyiblər. Digərləri isə alver olmadığı üçün işlərini dayandırdıqlarını söyləyiblər.
Bir sakin deyir ki, İrandan daha mal gəlmir:
«Orada «rus bazarı» çöküb»
«Əslində baxsan, sərhəd bağlı deyil. Maşınlar gedib-gəlir. İrandan da gələnlərə maneə yoxdur. Bizim camaat ki, oraya alış-verişə gedirdilər, onlara icazə verilmir. Eşitmişik ki, İran Astarasında da ticarət obyektlərin çoxu işləmir. Orda «rus bazarı» çöküb».
Buna da bax: DGK koronavirus aşkarlanan şəxslə bağlı açıqlama yayıb
«İndiyə kimi xəstəxanaya 143 nəfər daxil olub»
Azərbaycana keçənlərin sərhəddə koronavirus təhlükəsinə görə yoxlandıqları, şübhə doğuran adamların təcili yardım maşınları ilə Cəlilabad Rayon Mərkəzi Xəstəxanasına göndərildikləri bildirilir. Adının çəkilməsini istəməyən bir həkimin deməsinə görə, xəstəxananın bir mərtəbəsi bu məqsədlə ayrılıb: «İndiyə kimi xəstəxanaya «Biləsuvar» və «Astara» gömrük-sərhəd keçid məntəqələrindən 143 nəfər daxil olub. Onlar xəstə deyil, sadəcə təhlükəsizlik baxımdan yoxlama aparılır. Yəqin, evlərinə buraxılacaqlar».
Sizin brauzer HTML5-i dəstəkləmir
İranda koronavirusdan ölənlərin sayı 19 nəfərə çatdı
«Onların çoxu qaçıb gedib evlərinə»
Onun sözlərinə görə, xəstəxanaya gətirilənlər narazılıq edirlər: «Bu qədər adamı buraya gətiriblər, bunun yeməyi var, yatmağı var. Deyirlər ki, biz xəstə deyilik, bizi saxlayıblar burda. Onların çoxu qaçıb gedib evlərinə. Şərait olmadığına görə narazılıq edirlər».
Cəlilabad Rayon Mərkəzi Xəstəxanasının baş həkimindən bu deyilənlərə münasibət almaq cəhdimiz nəticə vermədi. O, suallarımıza cavab vermədən telefonu söndürdü.
Deyilənlərə, hələlik, Səhiyyə Nazirliyindən də münasibət almaq mümkün olmayıb.
Buna da bax: Koronavirusdan necə qorunmalı
Hazırda bir çox ekspertlər belə bir sual səsləndirirlər: «Virusun inkubasiya dövrü 14 günə qədərdirsə, İrandan gələn şəxslər nədən sərhəddə qısa yoxlamadan sonra ölkəyə buraxılırlar?».
Bu suala da, hələlik, rəsmilərdən cavab almaq mümkün olmayıb.
Xatırlatma
Ötən ilin sonu Çində yeni koronavirus aşkarlanıb. Bu virusdan ölənlərin sayının Çində 2.8 minə yaxınlaşdığı bildirilir. Yeni virusun bir çox ölkələrə də yayıldığı vurğulanır.
Artıq bu virusun Azərbaycanın sərhədlərinə də çatdığı bildirilir. İranda bir çox şəxslərin bu virusdan öldüyü vurğulanır. Hazırda bəzi ölkələr İranla sərhədi bağladıqlarını açıqlayıblar.
Azərbaycan isə, hələlik, İranla sərhədi tam olaraq bağlamayıb.