Azərbaycan Xalq Cəbhəsi Partiyası (AXCP) Rəyasət Heyətinin həbsdə olan üzvləri Fuad Qəhrəmanlı və Məmməd İbrahim ev dustaqlığına buraxılmaq üçün məhkəməyə müraciət edib. Sentyabrın 18-də Nəsimi rayon Məhkəməsində onların vəkillərinin bu barədə vəsatətlərinə baxılıb. Onların işlərinə ayrı-ayrılıqda baxılıb, amma hər ikisi öz məhkəməsində iştirak edib.
Buna da bax: Ailəsi F.Qəhrəmanlının səhhətindən narahatdır
AzadlıqRadiosunun əldə etdiyi məlumata görə, F.Qəhrəmanlı Nəsimi rayon Məhkəməsində dustaqların saxlandığı gözləmə otağında digərləri ilə birlikdə yox, ayrıca otaqda saxlanılıb. O, Bakı İstintaq Təcridxanasından məhkəməyə də ayrı gətirilib.
F.Qəhrəmanlıya dövlət hesabına təyin edilmiş vəkil Araz Həsənov onun ayrı saxlanması barədə sualı şərh etmək istəməyib, bu məsələnin onun səlahiyyətinə aid olmadığını bildirib. Vəkil F.Qəhrəmanlının səhhətində problem olmadığını da deyib: "Məhkəmədə fikrini sərbəst izah elədi. Məhkəmə vəsatəti təmin etmədi. Apellyasiya şikayəti verəcəyik".
M.İbrahim
"Sözlə yazmaq asandır, sübut olunsun"
M.İbrahimin məhkəməsi barədə AzadlıqRadiosuna oğlu Turan İbrahim məlumat verərək bildirib ki, artıq istintaq başa çatıb, onun barəsində həbs-qətimkan tədbirinin davam etməsi üçün əsas yoxdur: "Həbs-qətimkan tədbiri seçilməsinin əsas məqsədi odur ki, şəxs istintaqdan yayına bilər, istintaqa təsir göstərə bilər. Amma bu işdə istintaq bitib".
Orduya dəstək yürüşü keçiriləndə atasının evdə olduğunu deyən T.İbrahimin sözlərinə görə, M.İbrahim həbsdə saxlandığı iki aya yaxın müddətdə onunla heç bir istintaq hərəkəti aparılmayıb. Həbs olunanda dindiriləndən başqa nə dindirmə olub, nə kiminləsə üzləşdirilib:
Buna da bax: Mehdi İbrahim: Fikirləşirdim ki, mən 3 ay həbsdə dözə bilmərəm..."İddia edirlər ki, guya yürüşdə baş verənləri evdən telefonla, "Messenger", "Whatsapp" proqramları vasitəsilə evdən idarə edib. Vəkil də istintaqda vəsatət verib ki, telefon zəngləri, digər proqramlarla yazışmaları araşdırılsın. Ortaya sübut qoyulsun ki, həqiqətən evdən idarə eləyib, göstərişlər verib. Sözlə yazmaq asandır, sübut olunsun. Vəsatəti təmin edib, ortaya sübut qoymayıblar".
M.İbrahimin də ev dustaqlığına buraxılması barədə vəsatət təmin olunmayıb. Onun haqqında qərardan da apellyasiya şikayəti veriləcək.
Orduya dəstək yürüşündən sonra həbs olunan AXCP Rəyasət Heyətinin daha bir üzvü Asif Yusiflinin şikayətinə isə sentyabrın 18-də Nərimanov rayon Məhkəməsində baxılıb. A.Yusiflinin vəkili onun evindəki axtarışla əlaqədar məhkəməyə şikayət verib.
A.Yusifli
Ailə üzvləri AzadlıqRadiosuna bildirib ki, A.Yusiflinin həbsindən bir müddət sonra evlərində axtarış aparılsa da, onlara buna icazə verən məhkəmə qərarı göstərilməyib: "Evdən kompüter və Asifin telefonunu götürüb aparıblar. Bu haqda protokol da tərtib eləmədilər, nə götürdüklərini sənədləşdirmədilər".
Məhkəməyə şikayətdə prokurorluq əməkdaşlarının bu addımı Avropa Konvensiyasının 8-ci (şəxsi və ailə həyatına hörmət hüququ) maddəsinin pozuntusu kimi qiymətləndirilib. Məhkəmədən də bu pozuntunun tanınması istənilib.
Buna da bax: Cəbhəçi gəncin atası: 'Narahatıq ki, görəsən, başına nə gəlib?'
Xatırlatma
Bu il iyulun 14-də Bakda orduya dəstək yürüşü keçirilib və orada olaylar yaşanıb. Baş Prokurorluq və Daxili İşlər Nazirliyinin birgə açıqlamasında yürüş zamanı polis əməkdaşlarına xəsarət yetirildiyi, xidməti avtomobillərin aşırıldığı, Milli Məclisə ziyan dəydiyi qeyd olunub.
Bu cinayət işi üzrə həbs olunanlara özgə əmlakına ziyan vurma, hakimiyyət nümayəndəsinə qarşı zor tətbiq etmə, ictimai asayişin pozulması ittihamları irəli sürülüb. AXCP-nin iki aparıcı üzvü – Məmməd İbrahim və Fuad Qəhrəmanlıya isə bunlardan əlavə həm də hakimiyyəti zorla ələ keçirməyə cəhd ittihamı verilib. İstintaqın sonunda hakimiyyəti zorla ələ keçirmə ittihamı hər ikisindən götürülüb. Əvəzində təqsirləndirilən şəxslərin hamısına CM-in 127-ci (qəsdən bədənə az ağır xəsarət yetirmə) maddəsi ilə yeni ittiham irəli sürülüb.
Bu cinayət işi üzrə ümumilikdə 37 nəfər təqsirləndirilən şəxs qismində tanınıb, onlardan 17-si AXCP üzvüdür.
Partiya ittihamların saxta olduğunu, həbs olunan üzvlərindən bir neçəsinin, o cümlədən, F.Qəhrəmanlı və M.İbrahimin həmin yürüşdə iştirak etmədiyini bəyan edib.