ABŞ-ın ATƏT-dəki missiyası Qarabağla bağlı bəyanat verib
ABŞ-ın ATƏT-dəki daimi missiyası Dağlıq Qarabağ münaqişəsi barədə bəyanatla çıxış edib.
Noyabrın 12-də bu bəyanatı səfir Ceymz S. Gilmor səsləndirib.
Bəyanatda deyilir ki, Birləşmiş Ştatlar ATƏT-in Minsk qrupunun üç həmsədrindən biri kimi Dağlıq Qarabağ münaqişə zonasında əldə olunmuş atəşkəsi və döyüşlərin dayandırılmasını alqışlayır:
“Biz həmişə demişdik ki, bu münaqişənin hərbi həll yolu yoxdur və biz, son zorakılıqlarda çox sayda mülkilər də daxil lüzumsuz insan ölümlərinin baş verməsindən dərin təəssüf hissi duyuruq. Bu situasiya davam etdikcə və biz noyabr 10-da açıqlanmış razılaşmanın detalları barədə daha çox öyrəndikcə beynəlxalq icmanın və ATƏT-n özünün sülh prosesinin şəffaflığının saxlanmasındakı rolunu xatırladırıq”.
Bəyanatda deyilir ki, ABŞ bölgədə yaranmış humanitar vəziyyətdən dərindən narahatlıq keçirir.
Bəyanat tərəfləri noyabrın 10-da elan edilmiş atəşkəsə sadiq qalmağa çağırır:
“Biz habelə hər iki tərəfi oktyabrın 29-da Cenevrədə razılaşdırılmış addımların dərhal atılmasına çağırırıq. Biz tərəfləri mülkiləri və mülki obyektləri qorumağa çağırırıq”.
Qışın yaxınlaşdığı bir vaxtda...
Bəyanatda deyilir ki, mülkilərin geniş miqyasda didərgin düşməsi, xüsusilə də pandemiya şəraitində və qışın yaxınlaşdığı bir dövrdə tamamilə lüzumsuz humanitar böhran yaradacaq:
“Biz tərəfləri zorakılığı yenidən qızışdıra biləcək addımlardan, qızışdırıcı ritorikadan və hərəkətlərdən çəkinməyə, zorakılığın dayandırılmasından davamlı sülhün yaradılması üçün istifadə etməyə çağırırıq. Biz kənar tərəfləri məsuliyyətlə hərəkət etməyə və zorakılığı qızışdıracaq və ya regional gərginliyi daha da artıracaq hərəkətlərdən çəkinməyə dəvət edirik”.
Bəyanatda daha sonra deyilir:
“Bu münaqişə son dərəcə uzun zamanda davam edir. Bunun nəticəsində bölgədəki insanların həyatı təsirlənib. Biz ümid edirik ki, davamlı sülh yaxındadır. Biz əminik ki, Minsk qrupu Dağlıq Qarabağa davamlı və daimi sülhün gətirilməsi işində iştiraka həmişə hazır olacaq”.
Türkiyə milli müdafiə naziri: ‘Rusiyadan böyük bir heyət gəlir’
Türkiyənin milli müdafiə naziri Hulusi Akar Dağlıq Qarabağda sülh missiyasının müzakirə olunması üçün Rusiyadan böyük bir nümayəndə heyətinin Ankaraya gələcəyini deyib.
Sabah qəzetinin yazdığına görə hərbi büdcənin müzakirəsindən sonra jurnalistlərin suallarına cavab verən Türkiyə naziri deyib ki, bu görüş zamanı Dağlıq Qarabağda sülh missiyasının taktiki və texniki məsələləri, “kimin harda duracağı” məsələsi müzakirə olunacaq.
Hulusi Akar deyib ki, Türkiyənin bu münaqişənin çözümündəki məqəsdi “atəşkəsin davamlığı, iştirakın davam etməsi, sərhədlərin açılması və əhalinin rifahının yüksəldilməsidir”.
Türkiyənin bu münaqişədəki yeri barədə sualın cavabında nazir bildirib ki, Ankara “həm masa arxasında, həm də torpaq üstündə bu məsələnin tam içindədir”.
Makron: Fransa Qarabağda davamlı sülh üçün köməyə hazırdır
Fransa Prezidenti Emmanuel Makron deyir ki, o, Dağlıq Qarabağ münaqişəsinin davamlı və balanslı həllində köməyə hazırdır.
ATƏT-in Minsk qrupunun üzvü olan Fransa Moskvanın vasitəçilik cəhdlərindən kənar qalmış kimi görünür. Fransada 400 min-600 min erməninin yaşadığı bildirilir.
"Prezident döyüşlərin bitməsindən məmnunluğunu bildirməklə yanaşı, Ermənistan və onun xalqı ilə dostluğunu yada salaraq Dağlıq Qarabağda bütün tərəflər üçün ədalətli, davamlı və məqbul sülhün qurulmasına hazır olduğunu vurğulayıb", - Fransa prezidentinin idarəsi bəyanatında bildirib.
Rusiyanın Xarici İşlər naziri Sergey Lavrov isə noyabrın 12-də deyirdi ki, Fransa və ABŞ nümayəndələri Dağlıq Qarabağda münaqişə tərəfləri arasında əldə olunmuş razılaşmanın müzakirəsi üçün Moskvaya gələcək.
