Azərbaycan irəlilədiyini bildirir
Oktyabrın 16-ı gün ərzində, 17-ə keçən gecə cəbhənin Ağdərə-Ağdam, və Füzuli- Hadrut-Cəbrayıl istiqamətlərində əməliyyat şəraitinin gərgin olaraq qaldığı bildirilir.
Bu məlumatı oktyabrın 17-i səhhər saat 8:52-də Azərbaycan Müdafiə Nazirliyi (AMN) yayıb.
Məlumatda yazılıb ki, Azərbaycan qoşunları irəliləməyə nail olub.
“Yaşayış məntəqələri atəşə tutulur”
“Humanitar atəşkəs rejimini kobudcasına pozan Ermənistan silahlı qüvvələri bu gün səhər saatlarından başlayaraq Tərtər, Ağdam, Bərdə və Ağcabədi rayonlarının ərazilərini atəşə tutur.”
Azərbaycan Müdafiə Nazirliyi (AMN) bu məlumatı isə oktyabrın 17-də saat 8:27-də yaymışdı.
Atəşkəs razılığı olmuşdu
Halbuki, Rusiyanın vasitəçiliyi ilə Azərbaycan və Ermənistan Xarici İşlər nazirləri oktyabrın 9-u, 10-da Moskvada danışıqlar apararaq atəşkəs barədə sənəd imzalamışdılar. Həmin sənədə görə, oktyabrın 10-u saat 12-dən cəbhədə tərəflər arasında atəşkəs əldə edilməliydi.
Amma həmin tarixdən sonra da cəbhədə bir çox istiqamətlərdə döyüşlərin davam etdiyi açıqlanıb. Azərbaycanın ikinci böyük şəhəri, cəbhə xəttindən uzaq Gəncənin oktyabrın11-i və17-də raket zərbələrinə tutulduğu bildirilib.Nəticədə üst-üstə 22 nəfər dinc sakinin həlak olduğu, 70-dan çoxunun isə yaralandığı açıqlanıb.
Azərbaycan və Ermənistan silahlı qüvvələrinin təmas xəttində sentyabrın 27-dən ağır döyüşlərin getdiyi bildirilir. Hər iki tərəfdən itkilər olduğu deyilir. Azərbaycan açıqlayıb ki, son günlər 50 civarında kəndi, Cəbrayıl şəhərini və Hadrut qəsəbəsini işğaldan azad edib.
Qarabağ münaqişəsi Ermənistanın Azərbaycana ərazi iddiaları ilə 1988-ci ildəbaşlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilib. Atəşkəs olsa da, tez-tez onun pozulduğu bildirilir. Xüsusilə 2016-cı ilin aprelində və bu ilin iyulunda cəbhədə ağır silahların işə düşdüyü, hər iki tərəfdən itkilər olduğu deyilirdi.
Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.
Oktyabrın 1-də bu qurumun həmsədr ölkələrinin liderləri birgə bəyanat yayaraq tərəfləri hərbi əməliyyatları dayandırıb, ilkin şərtsiz sülh danışıqlarını bərpa etməyə çağırıb.
Baş Prokuror və Fövqəladə Hallar naziri Gəncədə
Azərbaycan Baş Prokuroru Kamran Əliyev və Fövqəladə Hallar naziri Kəmaləddin Heydərov oktyabrın 17-də Gəncəyə gəliblər.
AZƏRTAC-ın xəbərində onların Ermənistan silahlı qüvvələrinin oktyabrın 17-də gecə saat 1 radələrində Gəncə şəhərinə yenidən raket atması nəticəsində dağılmış əraziyə baxış keçirdikləri bildirilir.
Eyni zamanda, onların axtarış-xilasetmə işləri ilə tanış olduqları qeyd edilir.
Oktyabrın 17-də gecə saat 1 radələrində döyüş bölgəsindən tamamilə kənarda yerləşən Azərbaycanın ikinci böyük şəhəri olan Gəncəyə raket zərbələri endirilib. Nəticədə, yaşayış evlərinə düşən raketlərin həmin evləri tamamilə dağıtdığı, sakinlərin dağıntılar altında qaldığı bildirilir.
İlkin məlumata görə, bu zaman 12 nəfər həlak olub, 40-dan çox şəxs yaralanıb, çoxsaylı mülki infrastruktur obyektlərə, nəqliyyat vasitələrinə külli miqdarda ziyan dəyib.
Prezident : Füzuli işğaldan azad edilib
Füzuli şəhərinin işğaldan azad edildiyi bildirilir.
Bu barədə oktyabrın 17-i prezident İlham Əliyev xalqa müraciətində bildirib.
Onun deməsinə görə, rayonun 7 kəndi də işğaldan azad edilib.
Prezidentin sözlərinə görə, bunlar Qoçəhmədli, Çimən, Cuvarlı, Pirəhmədli, Musabəyli, İşıqlı və Dədəli kəndləridir.
FHN: “Dağıntılar altından xəsarət almış 52 nəfər və 13 cəsəd çıxarılıb”
Fövqəladə Hallar Nazirliyi (FHN) Gəncədə axtarış-xilasetmə işləri ilə bağlı məlumat açıqlayıb. Məlumatda qeyd edilib ki, Ermənistan ordusu oktyabrın 17-də gecə saat 01:00 radələrində döyüş bölgəsindən tamamilə kənarda yerləşən, Azərbaycanın ikinci böyük şəhəri olan Gəncəyə yenidən raket zərbələri endirib, böyük dağıntı və insan tələfatı törədib.
“Bu vaxta qədər dağıntılar altından xəsarət almış 52 nəfər və 13 nəfərin cəsədi çıxarılıb.”, məlumatda vurğulanıb.