Goranboy və Tərtərdə yaralanan olduğu bildirilir

Goranboy və Tərtər rayonlarının mülki əhalisindən yaralananların olduğu deyilir.

Baş Prokurorluğun mətbuat xidmətindən bildiriblər ki, Ermənistanın silahlı qüvvələri oktyabrın 9-da saat 18 radələrindən başlayaraq Goranboy, Tərtər rayonlarını müxtəlif istiqamətlərdən raket və artilleriya mərmilərindən intensiv atəşə tutub.

Qeyd edilir ki, Goranboy rayonunun Tapqaraqoyunlu kəndinə 22 top mərmisi atılıb:

“1980-ci il təvəllüdlü Mehracov Sənan Yusif oğlu müxtəlif dərəcəli bədən xəsarətləri alaraq xəstəxanaya yerləşdirilib. Bundan başqa, Tərtər rayonunun inzibati mərkəzinin də eyni zamanda top atəşinə tutulması nəticəsində rayon sakini, 1968-ci il təvəllüdlü Fərəcov Müşfiq Təvəkkül oğlu müxtəlif dərəcəli bədən xəsarətləri alaraq xəstəxanaya yerləşdirilib.”

Qurumun mətbuat xidmətinin bundan əvvəl yaydığı məlumata görə, sentyabrın 27-dən hazırkı vaxtadək qarşı tərəfin silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən ümumilikdə 31 mülki şəxs həlak olub, 168 nəfər yaralanıb.

Bakı və Yerevan atəşkəsə razılaşdılar

Moskvada Dağlıq Qarabağa dair Rusiya, Azərbaycan və Ermənistan xarici işlər nazirləri – Sergey Lavrov, Ceyhun Bayramov və Zohrab Mnatsakanyan arasında keçirilən üçtərəfli danışıqlarda Bakı və Yerevan Qarabağda atəşin dayandırılmasına razılaşıblar.

Atəşkəs oktyabrın 10-da saat 12:00-da qüvvəyə minir.

Danışıqlar 12 saat müddətində, demək olar fasiləsiz davam edib.

Bu barədə məlumatı Sergey Lavrova istinadən RIA Novosti agentliyi verib.

Lavrov deyib ki, Rusiya prezidenti Vladimir Putinin çağırışı ilə, habelə Azərbaycan prezidenti İlham Əliyev və Ermənistan baş naziri Nikol Paşinyan arasında razılaşmalara müvafiq olaraq tərəflər humanitar məqsədlə hərbi əsirlərin və başqa saxlanan şəxslərin Qırmızı Xaç Komitəsinin vasitəçiliyi ilə dəyişdirilməsi üçün oktyabrın 10-u, saat 12-dən atəşin dayandırılmasına dair razılığa gəliblər.

Bu da bildirilir ki, Bakı və Yerevan münaqişənin dinc yolla ən qısa müddətdə tənzimlənməsi məqsədilə “substantiv danışıqlara” başlamaq barədə razılaşma əldə ediblər.

Məlumatda vurğulanır ki, tərəflər habelə Qarabağa dair danışıqlar formatının dəyişməzliyini təsdiq ediblər.

AMN:“Gecə ərzində gərgin döyüşlər davam edib”

Xocalı istiqamətindən Hadrut qəsəbəsinin yaylım atəşli reaktiv sistemlərdən intensiv atəşə tutulduğu bildirilir.

Bu məlumatı bu gün, oktyabrın 10-da səhər saat 9-24-də Azərbaycan Müdafiə Nazirliyi (AMN) yayıb.
“Ordumuz Ermənistan silahlı qüvvələrinə qarşı adekvat tədbirlər görür”,məlumatda yazılıb.

Azərbaycan dünən, oktyabrın 9-da Hadrut qəsəbəsinin işğaldan azad edildiyini açıqlayıb.

AMN bu məlumatdan təqribən 10 dəqiqə əvvəl yaydığı açıqlamada isə bildirilirdi ki, oktyabrın 9-da günün ikinci yarısından oktyabrın 10-u səhər saatlarınadək bütün cəbhə boyu hərbi əməliyyatlar müxtəlif intensivliklə davam edib

Atəşkəs olacaq

Amma bununla belə yaxın saatlarda atəşkəsin bərpa ediləcəyi gözlənir.

Bununla bağlı oktyabrın 10-u saat 4-57-də Azərbaycan Xarici İşlər Nazirliyi (XİN) məlumat yayıb.

Məlumatda qeyd edilib ki, Rusiya tərəfinin təşəbbüsü əsasında 9-10 oktyabr tarixlərində Moskva şəhərində keçirilən görüş nəticəsində Rusiya, Azərbaycan və Ermənistan Xarici İşlər nazirlərinin bəyanatı qəbul edilib.

Bəyanatda yazılana görə, Rusiya prezidenti V.Putinin müraciətinə cavab olaraq, onunla Azərbaycan prezidenti İ.Əliyev və Ermənistan Baş naziri N.Paşinyan arasında əldə olunmuş razılığa əsasən aşağıdakı addımların atılması razılaşdırılıb:

“1. 2020-ci ilin 10 oktyabr tarixi, saat 12.00 dan etibarən humanitar məqsədlərlə Beynəlxalq Qırmızı Xaç Komitəsinin vasitəçiliyi və onun kriteriyalarına uyğun olaraq, hərbi əsirlər və digər saxlanılan şəxslər və ölənlərin meyitlərinin dəyişdirilməsi üçün atəşkəs elan olunur;

2. Atəşkəs rejiminin konkret parametrləri əlavə olaraq razılaşdırılacaq;

3. Azərbaycan Respublikası və Ermənistan Respublikası ATƏT-in Minsk Qrupunun həmsədrlərinin vasitəçiliyi ilə tənzimlənmənin əsas prinsipləri əsasında münaqişənin tezliklə sülh yolu ilə həlli məqsədilə substantiv danışıqlara başlayırlar;

4. Tərəflər danışıqlar formatının dəyişilməzliyini təsdiq edirlər.

Xatırlatma

Azərbaycan və Ermənistan silahlı qüvvələrinin təmas xəttində sentyabrın 27-dən ağır döyüşlərin getdiyi bildirilir. Hər iki tərəfdən itkilər olduğu deyilir. Azərbaycan açıqlayıb ki, son günlər 30-dan çox kəndi, Cəbrayıl şəhərini və Hadrut qəsəbəsini işğaldan azad edib.

Qarabağ münaqişəsi Ermənistanın Azərbaycana ərazi iddiaları ilə 1988-ci ildəbaşlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilib. Atəşkəs olsa da, tez-tez onun pozulduğu bildirilir. Xüsusilə 2016-cı ilin aprelində və bu ilin iyulunda cəbhədə ağır silahların işə düşdüyü, hər iki tərəfdən itkilər olduğu deyilirdi.
Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.

Oktyabrın 1-də bu qurumun həmsədr ölkələrinin liderləri birgə bəyanat yayaraq tərəfləri hərbi əməliyyatları dayandırıb, ilkin şərtsiz sülh danışıqlarını bərpa etməyə çağırmışdı.

AMN: “Yaşayış məntəqələri intensiv atəşə məruz qalır”

“Ermənistan silahlı qüvvələri Goranboy, Tərtər, Ağdam, Ağcabədi və Füzuli rayonlarının yaşayış məntəqələrini intensiv atəşə məruz qoyur.”

Bu məlumatı isə Azərbaycan Müdafiə Nazirliyi (AMN) oktyabrın 10-u saat 10-06 radələrində yayıb.

AMN qeyd edib ki, cavab tədbirləri görülür.