"Azərbaycan ərazisi Ermənistandan raket atəşinə tutulub"
Azərbaycan ərazisinin Ermənistandan raket atəşinə tutulduğu bildirilir.
Bu barədə oktyabrın 5-i saat 10-16-da Azərbaycan Müdafiə Nazirliyi (AMN) məlumat yayıb.
Məlumatda yazılıb ki, oktyabrın 5-də səhər saatlarında ölkənin Hava Hücumundan Müdafiə Qüvvələrinin Radiolokasiya sistemlərinin texniki vasitələri Ermənistanın Cermuk, Qafan və Berd rayonları ərazisində yerləşən start mövqelərindən Azərbaycan ərazisinə atılan raket buraxılışını qeydə alıb.
Açıqlamaya görə, bütün cəbhə boyu sıxışdırılan qarşı tərəf artıq, bir neçə gündür ki, Ermənistandan Azərbaycan ərazisində əhalinin kompakt yaşadığı məntəqələrə, mülki infrastruktura sistematik raket zərbələri endirir. "Eyni zamanda, Ermənistanın Müdafiə Nazirliyi Azərbaycan ərazisinin Ermənistandan atəşə tutulması faktını inkar edir və bunun işğal olunmuş ərazilərimizdən həyata keçirildiyini bildirir...", - MN qeyd edir.
MN: "Şəhərlərimiz atəşə tutulur"
"Hazırda Beyləqan, Bərdə və Tərtər şəhərləri Ermənistan silahlı qüvvələri tərəfindən atəşə tutulur".
Bu məlumatı da oktyabrın 5-də saat təqribən 11-də Azərbaycan Müdafiə Nazirliyi (AMN) yayıb.
Açıqlamada qeyd edilib ki, buna qarşı adekvat tədbirlər görülür.
Qırmızı Xaç mülki əhaliyə atəş açmamağa çağırır
Beynəlxalq Qırmızı Xaç Komitəsi oktyabrın 4-də şəhərlərdə, digər yaşayış ərazilərində partlayıcı silahlardan istifadə edərək fərq qoymadan atəş açılması və digər iddia olunan qanunsuz hücumlar haqda xəbərləri pisləyib.
Beynəlxalq Böhran Qrupundan Olesya Vartanyan AzadlıqRadiosuna deyib ki, indilik münaqişənin daha da qızışacağı və mülki əhali yaşayan daha çox ərazini əhatələyəcəyi görünür.
"Mülki yaşayış yerlərində hücumlar artır, daha müasir silahlardan istifadə olunur... Sonrakı günlərdə döyüşlərin cəbhə zonasından uzaq ərazilərə yayılacağını görəcəyik", – Vartanyan deyib.
'Azərbaycan lideri döyüşləri dayandırmağa 'yox' deyir...'
"Reuters" yazır ki, Azərbaycan prezidenti İlham Əliyevin dünənki çıxışının məzmunu və tonu Azərbaycanın beynəlxalq qurumların dərhal atəşkəs çağırışlarını qəbul etməyəcəyini aydın şəkildə ortaya qoydu.
Ermənistan Müdafiə Nazirliyinin rəsmisi Artsrun Ovannisyan bu çıxışdan dərhal sonra deyib: "Məncə, Yerevana hər hansı risk yoxdur, amma yenə də müharibə şəraitindəyik".
Türkiyənin Xarici İşlər Nazirliyi də bazar günü Azərbaycan ərazisinin Ermənistandan atəşə tutulmasını pisləyib: "Ermənistanın Gəncədə mülki şəxslərə hücumu... Ermənistanın qanunsuz münasibətinin yeni göstəricisidir. Bu hücumları pisləyirik".