Makron yenə Əliyevə zəng vurub
Oktyabrın 2-də Fransa prezidenti Emmanuel Makron Azərbaycan prezidenti İlham Əliyevə zəng edib.
Bu barədə Azərbaycan prezidentinin mətbuat xidməti məlumat yayıb.
Məlumatda yazılıb ki, Fransa prezidenti Ermənistan-Azərbaycan təmas xəttində döyüşlərin davam etməsindən narahatlıq hissi ifadə edərək atəşkəsin bərpa edilməsi və tezliklə danışıqların aparılmasına çağırıb.
“Prezident İlham Əliyev bildirib ki, Ermənistan silahlı qüvvələri tərəfindən Azərbaycanın yaşayış məntəqələrinin ağır artilleriya atəşinə tutulması nəticəsində 19 mülki şəxsimiz həlak olub, 60-dan çox adam yaralanıb, yüzlərlə ev dağıdılıb. Azərbaycan Ordusu uğurlu əks-hücum əməliyyatları həyata keçirərək işğal olunmuş ərazilərimizin bir hissəsini işğaldan azad edib.”, məlumatda yazılıb.
Məlumatda bildirildiyinə görə, dövlət başçısı onu da qeyd edib ki, Ermənistan danışıqlar prosesinin pozulması istiqamətində addımlar ataraq bu prosesə böyük zərbə vurub. “ Prezident İlham Əliyev vurğulayıb ki, danışıqların pozulması, eləcə də silahlı qarşıdurmanın yaranmasına görə məsuliyyət tam şəkildə Ermənistan rəhbərliyinin üzərinə düşür.”, məlumatda oxuyuruq.
Fransa prezidenti Azərbaycan və Ermənistan silahlı qüvvələrinin təmas xəttində sentyabrın 27-də ağır döyüşlər başladıqdan bir gün sonra, sentyabrın 28-də də prezident İlham Əliyevə zəng vuraraq yenə atəşkəsin bərpa edilməsi və tezliklə danışıqların aparılmasına çağırış etmişdi.
“ Tərtər, Ağdam, Ağcabədi və Goranboy artilleriya atəşinə tutulub”
“Oktyabrın 3-ü gecə ərzində Ermənistan silahlı qüvvələri tərəfindən Tərtər şəhəri, rayonun Səhləabad, Qəzyan, Qapanlı, Qaynaq, Əskipara, Hüsənli, Ağdam rayonunun Ayaq Qərvənd, İmamqulubəyli, Qaradağlı, Təzəkənd, Ağcəbədi rayonunun Muğanlı, Qiyaməddinli, Rəncbərlər və Goranboy rayonunun Tapqaraqoyunlu kəndi intensiv artilleriya atəşinə tutulub”.
Bu məlumatı da Azərbaycan Müdafiə Nazirliyi ( AMN) oktyabrın 3-də saat 10-37-də yayıb:
“Hazırda Ağdam rayonunun Quzanlı, Əlibəyli və Ayaq Qərvənd kəndləri artilleriya atəşinə tutulur”
AMN bildirməsinə görə, qarşı tərəfə cavab verilir.
AMN təyyarə və PUA-larının vurulduğunu təkzib edir
“Ermənistan tərəfi bu gün ( oktyabrın 3-də ) yenidən guya Azərbaycan Hərbi Hava Qüvvələrinə məxsus təyyarələrin və pilotsuz uçuş aparatlarının (PUA) vurulması ilə bağlı dezinformasiya yayıb.”
Bunu Azərbaycan Müdafiə Nazirliyinin (AMN) mətbuat xidmətinin rəisi polkovnik Vaqif Dərgahlı deyib.
O, bildiririb ki, Azərbaycan Hərbi Hava Qüvvələrinə məxsus heç bir döyüş təyyarəsi vurulmayıb.
Onun deməsinə görə, əksinə, Azərbaycanın zərbə PUA-ları Ermənistan silahlı qüvvələrinin döyüş texnikalarını vurur.
Baş Prokuror: “12 cinayət işi başlanıb”
“Ermənistan silahlı qüvvələrinin dinc əhaliyə qarşı törətdiyi cinayətlərlə bağlı Azərbaycan Baş Prokurorluğu tərəfindən 12 cinayət işi başlanıb. Bu günədək ( sentyabrın 27-dən bəri-red) 19 mülki şəxs həlak olub. Təəssüf doğurucu hal ondan ibarətdir ki, həlak olan şəxslər arasında qadınlar və uşaqlar da var...”
Bunu Azərbaycan Baş prokuroru Kamran Əliyev oktyabrın 3-də təşkil olunan brifinqdə söyləyib.
Baş prokuror bildirib ki, Ermənistan silahlı qüvvələrinin hərbi birləşmələrinin artilleriya silahlarından atdığı mərmi nəticəsində Naftalan şəhərinin Qaşaltı Qaraqoyunlu kəndi sakini Elbrus İsa oğlu Qurbanov və ailəsinin dörd üzvü – anası, həyat yoldaşı, övladları həlak olub. Həmin faktlarla bağlı Cinayət Məcəlləsinin 120.2.1-ci (cinayətkar birlik–təşkilat tərəfindən qəsdən adam öldürmə), 120.2.4-cü (qabaqcadan əlbir olan bir qrup şəxs tərəfindən xuliqanlıq niyyəti ilə xüsusi amansızlıqla qəsdən adam öldürmə) və digər maddələr ilə cinayət işi başlanıb. K.Əliyev həmçinin qeyd edib ki, Ermənistan silahlı qüvvələrinin təxribatları nəticəsində 63 dinc sakin yaralanıb.