Diplomatlar Bərdəyə gedib
Bu gün, oktyabrın 29-da Azərbaycandakı diplomatik korpusun nümayəndələri Bərdəyə səfər edib.
Onları Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev və Baş prokuror Kamran Əliyev müşayiət edir.
Diplomatlar Bərdə rayonunda oktyabrın 27-i və 28-də raket atılan ərazilərə baş çəkməlidirlər. Bu raket zərbələrindən Bərdə rayonunda üst-üstə 25 mülki insanın həlak olduğu, 80 nəfərdən çoxunun isə yaralandığı bildirilir.
Azərbaycanın rəsmi qurumları bildirir ki, raketləri Ermənistan silahlı qüvvələrinin bölmələri atıb. Ermənistan tərəfi isə bunu təsdiqləmir.
Bərdə rayonu cəbhə xəttindən bir qədər kənarda yerləşir.
Baydendən daha bir Qarabağ çağırışı
ABŞ-da prezidentliyə Demokrat Partiyasından namizəd Co Bayden Dağlıq Qarabağ münaqişəsi ilə bağlı daha bir bəyanat yayıb. Bəyanatda deyilir ki, Dövlət katibi Mayk Pompeonun oktyabrın 25-də elan etdiyi atəşkəsdən sonra "Dağlıq Qarabağ xalqı üçün irimiqyaslı humanitar fəlakət başlanıb". Bayden prezident Donald Trampı Ermənistan, Azərbaycan və Türkiyə liderləri ilə birbaşa danışmaqla de-eskalasiyaya dərhal nail olmağa, Azərbaycan hərbçilərinin Dağlıq Qarabağa doğru irəliləməsini dayandırmağa çağırıb.
Bayden Tramp administrasiyasını Azərbaycana hərbi avadanlıq axınını dayandırmaq üçün Azadlığa Dəstək Aktına 907-ci əlavəni tam yerinə yetirməyə, Türkiyə və Rusiyanın silah təchizatı ilə münaqişəni qızışdırmasını dayandırması üçün onlara müraciət etməyə səsləyir.
"Birləşmiş Ştatlar döyüşləri dayandırmaq üçün avropalı tərəfdaşları ilə birlikdə diplomatik cəhdlərə liderlik etməli, əziyyətləri bitirməkdən ötrü beynəlxalq humanitar yardım təşəbbüsü irəli sürməlidir; mən administrasiyam dövründə məhz belə edəcəyəm", – Bayden vurğulayıb.
Həlak olan erməni hərbçilərin sayı açıqlanıb
Dağlıq Qarabağdakı separatçı rejimin oktyabrın 29-da bildirməsinə görə, ölən hərbçilərin sayı 1119 nəfərə çatıb.
Məlumatda Dağlıq Qarabağdakı mülki yaşayış məntəqələrinin Azərbaycan qüvvələri tərəfindən atəşə tutulduğu iddia olunur.
Azərbaycan isə heç vaxt mülki hədəflərə atəş açmadığını, yalnız legitim hərbi hədəfləri vurduğunu bildirir.
"Dağlıq Qarabağ münaqişəsi nəzarətdən çıxa bilər"
Beynəlxalq Qırmızı Xaç Komitəsi cəbhə xəttinin hər iki tərəfindən şəhər yerlərinə atəş açıldığına şahid olduğunu bildirir. Qurumun məlumatına görə, Azərbaycan Qırmızı Xaç Cəmiyyətindən bir könüllü atışmada öldürülüb, ikisi isə yaralanıb.
"Son baş verənlər Dağlıq Qarabağ münaqişəsinin nəzarətdən çıxa biləcəyini göstərir. Mülki şəxslərin ölüm halları narahatedici dərəcədə artır", – qurumun Avrasiya üzrə regional direktoru Martin Şüepp deyib.