Azərbaycan mövqelərinin atəşə tutulduğunu deyir
Ermənistan silahlı qüvvələrinin bütün cəbhə boyu atəşkəsi pozduğu bildirilir.
Bu barədə Azərbaycan Müdafiə Nazirliyi (MN) oktyabrın 26-sı, saat təqribən 9:45 radələrində yeni məlumat yayıb.
Məlumatda qeyd edilib ki, Ermənistan iki ölkənin dövlət sərhədində yerləşən Azərbaycanın yaşayış məntəqələrini və bölmələrinin mövqelərini də müxtəlif növ atıcı silahlar, minaatanlar və toplardan atəşə tutur. Bildirilir ki, səhər saatlarından başlayaraq Ermənistanın Berd, Çəmbərək, Vardenis rayonları ərazisindən Azərbaycanın Tovuz, Gədəbəy və Daşkəsən rayonlarının əraziləri atəşə tutulub. Tərtər, Ağdam, Füzuli, Laçın və Qubadlı istiqamətlərində yerləşən Azərbaycan bölmələrinin mövqelərinin də atəşə məruz qaldığı vurğulanır.
Prezidentin köməkçisi Ermənistanı günahlandırdı
"Ermənistan silahlı qüvvələri humanitar atəşkəsi pozaraq saat 08:04-dən Tərtər rayonunu və onun kəndlərini atəşə tutmağa başlayıblar".
Bu sözləri Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev özünün Twitter səhifəsində yazıb.
"Azərbaycan Müdafiə Nazirliyinin verdiyi məlumata görə, Ermənistan artilleriya və minaatanlarla saat 08:05-dən qüvvələrimizə hücum edir", - H.Hacıyev əlavə edib.
BMT atəşkəsi alqışlayır
BMT-nin Baş katibi Antonio Quterreş yeni atəşkəs razılaşmasını alqışlayıb, Azərbaycanı və Ermənistanı onu yubanmadan tam icra etməyə, ilkin şərtsiz substantiv danışıqları bərpa etməyə çağırıb, - BMT-nin sözçüsü Stefan Ducarriç deyib.
BMT-nin başçısı tərəfləri Dağlıq Qarabağa yardım aparılması üçün maneəsiz humanitar çıxışı təmin etməyə, Dağlıq Qarabağ münaqişəsinin dinc yolla həllinə doğru konkret addımlar atmağa səsləyib.
Dağlıq Qarabağdakı separatçı rejim sentyabrın 27-dən bəri toqquşmalarda 974 əsgərinin və 37 mülki şəxsin öldürüldüyünü deyir. Azərbaycan tərəfi hərbçi itkisini açıqlamasa da, 65 dinc sakinin öldürüldüyünü, 300 nəfərin yaralandığını bəyan edir.
Ermənistan və Azərbaycanla həmsərhəd İranın da narahatlığı artır. İslam İnqilab Keşikçiləri Korpusu (İİKK) bazar günü münaqişə zonasına yaxın sərhədə quru qüvvələri bölmələrini yerləşdirdiyini açıqlayıb. İİKK-nın quru qüvvələrinin komandanı Məhəmməd Pakpur bildirib ki, İran regionda İran xalqının təhlükəsizliyi və dincliyini pozan hər hansı hərəkəti qəbul etməyəcək.
Tərtər atəşə tutulub
"Ermənistan silahlı qüvvələri yeni humanitar atəşkəs rejimini kobud şəkildə pozaraq oktyabrın 26-da Tərtər şəhərini və rayonun kəndlərini artilleriya atəşinə tutub", - MN oktyabrın 26-ı, saat 8:24-də bildirib.