Bərdənin vurulduğu bildirilir
Bərdə rayonunun da atəşə tutulduğu bildirilir.
Bu barədə Azərbaycan Müdafiə Nazirliyi oktyabrın 2-də saat 13 radələrində məlumat yayıb.
Məlumatda bildirilir ki, Ermənistan silahlı qüvvələri Bərdə rayonunun Əmirli, Tovuz rayonun Ağdam və Ağdam rayonun Quzanlı yaşayış məntəqələrini raket atəşinə tutur.
Quzanlı raket atəşinə tutulur
Ermənistan ərazisindən Şəmkir rayonunun Sabirkənd, işğal olunmuş Azərbaycan ərazilərindən isə Ağdam rayonun Quzanlı yaşayış məntəqələrinin raket atəşinə tutulduğu bildirilir.
Bu barədə Azərbaycan Müdafiə Nazirliyi oktyabrın 2-də günorta saatlarında məlumat yayıb.
Ağdam rayonunun mərkəzi Ağdam şəhəri 1993-cü ildə işğal edilib. Bundan sonra bu rayonun mərkəzi işğal altında olmayan Quzanlı qəsəbəsinə köçürülüb.
Ermənistan danışıqlara hazır olduğunu deyir
Ermənistan Qarabağda əməliyyatların dayandırılmasından ötrü danışıqlara başlamağa hazır olduğunu bildirib.
Açıqlamanı bu ölkənin Xarici İşlər Nazirliyi yayıb.
Qurum bildirir ki, 1994-1995-ci illərdə əldə olunmuş razılaşmalar əsasında, ATƏT-in Minsk qrupunun vasitəçiliyi ilə danışıqlarla hazırdır.
Bəyanatda Yerevanın münaqişənin sülh yoluyla həllinə sadiq olduğu vurğulanır.
Ermənistan XİN ATƏT-in Minsk qrupu liderlərinin bir gün öncəki bəyanatını alqışladığını bildirib. Bəyanatda həmsədrlər tərəfləri Dağlıq Qarabağda döyüşləri dərhal dayandırmağa çağırırdı.
"Ermənistan Dağlıq Qarabağ münaqişəsinin dinc yolla həllinə sadiqdir... ATƏT-in Minsk qrupunun həmsədr ölkələri ilə 1994-1995-ci il sazişləri əsasında atəşkəs rejimi yaradılmasına işləməyə hazırıq", – bəyanatda deyilir.
