Talış kəndi ətrafındakı yüksəkliklərin azad edildiyi bildirilir
Azərbaycan ordusunun əks-hücum əməliyyatını davam etdirdiyi bildirilir.
Bu barədə Azərbaycan Müdafiə Nazirliyi (AMN) sentyabrın 28-də saat 9:30-da məlumat yayıb.
Məlumatda yazılıb ki, Ermənistan silahlı qüvvələrindən azad edilən yüksəkliklərdən və əlverişli mövqelərdən hərəkətə keçən Azərbaycan Ordusunun bölmələri əldə olunmuş müvəffəqiyyəti artırmaq məqsədilə əks-hücum əməliyyatını davam etdirir.
MN-dən qeyd edildiyinə görə, qarşı tərəfin müqavimət göstərdiyi mövqelərə raket-artilleriya və aviasiya zərbələri endirilməklə o, sıxışdırılaraq əldə saxlamaq istədiyi hədlərdən geri çəkilməyə məcbur edilir.
Açıqlamaya görə, Talış kəndi ətrafındakı bir neçə əlverişli yüksəklik azad edilib.
C.Bayramov ABŞ Dövlət katibinin müavini ilə danışıb
Sentyabrın 27-də xarici işlər naziri Ceyhun Bayramov və ABŞ Dövlət katibinin müavini Stiven Biqan arasında telefon danışığı olub.
Bu barədə Azərbaycan Xarici İşlər Nazirliyinin (XİN) yaydığı məlumatda bildirilir.
Məlumata görə, ABŞ rəsmisi bölgədə baş verən yüksək gərginlik ilə bağlı ciddi narahatlığını ifadə edərək hazırkı vəziyyəti soruşub.
Qeyd edildiyinə görə, nazir C.Bayramov Ermənistan silahlı qüvvələrinin növbəti təcavüz aktı barədə məlumat verərək Azərbaycan silahlı qüvvələrinin özünümüdafiə hüququ çərçivəsində mülki əhalisini müdafiə etmək məqsədilə cavab həmlələri həyata keçirdiyini vurğulayıb.
C.Bayramov yaranmış vəziyyətin tam məsuliyyətinin Ermənistan üzərində olduğunu söyləyib.
XİN-in məlumatına görə, ABŞ Dövlət katibinin müavini S.Biqan öz növbəsində gərginliyin azaldılması üçün tərəflərin müvafiq addımlar atmasının vacibliyini qeyd edib.
Müdafiə Nazirliyi: "Tərtər şəhəri atəşə tutulur"
"Sentyabrın 28-i səhər saatlarından başlayaraq Ermənistan silahlı qüvvələrinin bölmələri tərəfindən Tərtər şəhəri atəşə tutulur".
Bu məlumatı bu gün, sentyabrın 28-də saat 7:50-də Azərbaycan Müdafiə Nazirliyi yayıb.
Müdafiə Nazirliyi rəhbərliyi qarşı tərəfi adekvat cavab tədbirləri görüləcəyi ilə xəbərdar etdiyini açıqlayıb.
